Abanyapolitiki barimo Agathon Rwasa na Charles Nditije n’amashyaka 6 atavuga rumwe n’ubutegetsi bw’u Burundi bandikiye Umunyamabanga Mukuru w’ Umuryango w’Abibumbye (ONU), Ban Ki Moon, basaba ko Komisiyo Ishinzwe gutegura Amatora (CENI), yaseswa hakajyaho indi yigenga.

Amakuru y’abanyamakuru ba Igihe I Burundi, avuga ko Agathon Rwasa, Charles Nditije barikumwe n’imitwe ya politiki irimo FRODEBU-NYAKURI, na PASIDE IMBONEZA bandikiye ONU, bashinja CENI kubogama, bagasaba ko iyi komisiyo yaseswa igasimburwa n’indi komisiyo ishobora gutegura amatora mu buryo yigenga.
Urwandiko rwohererejwe Umunyamabanga wa Loni, ngo rugaragaramo bimwe mu bimenyetso bigaraza ko kwiba amajwi mu matora byatangiye gutegurwa.

Uru rwandiko rugira ruti “Hatangiye gutangwa amakarita ndangamuntu mu buryo bwa magendu, ndetse hari n’izihabwa abatujuje imyaka cyangwa abanyamahanga.”

Muri uru rwandiko aba banyepoliki banagaragazamo ko abayobozi mu nzego z’ibanze nabo ubwabo bafata ikarita ndangamuntu zirenze imwe, bakemeza ko ari ibimenyetso simusiga bigaragaza itegurwa ry’ubujura bw’amajwi mu matora ari imbere.

Icyo aba banyapolitiki n’amashyaka atavuga rumwe n’ubutegetsi basaba Loni, ngo ni ikurwaho rya Komisiyo Itegura Amatora hagashyirwaho indi yigenga.

Banasaba kandi Loni ko kwandika abazatorwa byasubirwamo kandi ikazakurikiranira hafi amatora yo muri iki gihugu ateganyijwe mu 2015.