Polisi y’u Burundi ivuga ko abishwe n’abafashwe ari abaheruka gutoroka igisirikare n’igipolisi baka bari bamaze iminsi bahigwa bukware. Abo ni Capt Bahenda Iddi Omar na Brigadier Niyongabo Jean Claude.

Aba, bishwe nyuma y’imirwano yabahuje n’igipolisi ntara ya Muramvya, iri hagati mu gihugu cy’u Burundi.

Mu gitondo cyo kuri uyu wa Gatatu, muri zone ya Cibitoke na Mutakura ziri muri komine Ntahangwa, ntawinjiraga cyangwa ngo asohoke, imihanda yari yafunzwe yose.

Kuva ku isaha ya saa tatu za mu gitondo, umuhanda uhuza Mutakura na Cibitoke ndetse n’uva mu Ngagara ujya Cibitoke yari ifunze.

Polisi y’u Burundi yabwiye BBC ko bari mu gikorwa cyo gusaka ibirwanisho, aho bafashe ibirwanisho n’ibindi bikoresho bya gisirikare harimwo n’imbunda imwe yo mu bwoko bwa karashinikov.

Mu ijoro ryakeye kuri uyu wa kabiri kandi, hari igisasu cyatewe ku kabari kitwa Whatsapp, kari muri zone Bwiza mu Mujyi wa Bujumbura, hakomereka abantu babiri, ikaba ari inshuro ya kabiri aka kabari gaterwa.
.
Kuva muri Mata 2015, mu Burundi hatangiye imvururu zishingiye kuri manda ya Gatatu ya Perezida Nkurunziza itaravuzweho rumwe. Kugeza ubu, abarenga 400 bamaze gupfa, na ho abasaga ibihumbi 300 bahunga igihugu.