Mu kiganiro cyihariye umuvugizi w’iri shyaka Lt. Col. Ntahompuriye Jean Felix yagiranye na KFM, yavuze ko biteguye neza gutabara abaturage bakomeje kwicirwa mu myigaragambyo yamagana manda ya gatatu ya Perezida Nkurunziza.

Lt Col.Ntahompuriye yavuze ko n’ubwo abigaragambya batatumwe na FNL, ngo igihe kigeze kugira ngo batabarwe.

Yagize ati’’ Abigaragambya ntabwo ari twe twabatumye ariko tugomba kubatabara niba Perezida Nkurunziza adahagaritse ubwicanyi.’’

Yakomeje avuga ko hari izindi mpamvu zizatuma barwanya Perezida Nkurunziza zitari uko yanze kurekura ubutegetsi.

Yagize ati “Hari n’ibindi bizatuma tumurwanya nko gutoteza abarwanashyaka ba FNL, ruswa, kubiba amacakubiri bikorwa na CNDD-FDD, gutuma ubutabera budakora ibikwiye n’ibindi.

Lt Col Ntahompuriye yavuze ko nta bundi bufasha bafite ariko ko biteguye gushoza intambara kandi bafite ubushobozi bwose kuko ngo ari benshi.

Inama yahuje abakuru b’ibihugu byo mu Karere k’Ibiyaga Bigari yahamagariye amashyaka yose mu Burundi gushyira hamwe bakagarura ituze n’amahoro mu gihugu.

Muri iki gihugu hamaze gupfa abasaga 20 baguye mu myigaragambyo kuva yatangira tariki ya 26 Mata 2015.