Aganira na BBC, Radjabu ntiyigeze atangaza aho aherereye, ahubwo yagize ati “ndi kumwe n’Abarundi kandi Abarundi babarizwa mu Burundi.”

Abajijwe ko yaba ari muri Tanzania nk’uko bivugwa, yavuze ko atakumirwa muri icyo gihugu, ariko kandi ntiyemeza ko ari ho ari.

Radjabu wahoze ayoboye ishyaka riri ku butegetsi mu Burundi, CNDD FDD, yavuze ko yafashe umwanzuro wo gutoroka nyuma yo kubona ko ubuzima bwe buri mu kaga.

Yakomeje avuga ko byageze aho afungirwa ahantu ha wenyine, asanga gutoroka ari wo gukiza ubuzima bwe.

Hussein Radjabu yahamije ko yasohotse muri gereza ya Mpimba amatara amurika (Habona), yemeza ko akiri mu ishyaka CNDD FDD kandi ngo kimwe mu byo agiye kuzana ni ukugarura umwuka mwiza muri iryo shyaka.

Yongeyeho ko ibintu bitifashe neza mu gihugu ku batavuga rumwe na leta ndetse na bamwe mu bari mu ishyaka riri ku butegetsi.

Ati “Amatora ashobora kutaba mu gihe hari umwuka mubi, nsanga hakwiye kubanza gushaka umuti w’ibyo bibazo.”

Hussein Radjabu yafunzwe mu kwezi kwa Mata 2007, aza guhamwa icyaha byo gushaka guhirika ubutegetsi no guhungabanya umutekano w’igihugu, ahanishwa igifungo cy’imyaka cumi n’itanu.

Yatorotse gereza mu ijoro ryo ku cyumweru tariki ya 01 Werurwe 2015, rishyira ku wa mbere tariki 02 Werurwe 2015.

Ubuyobozi bwa gereza ya Mpimba butangaza ko Hussein yafashijwe gutoroka na bamwe mu bapolisi barinda iyo gereza.

N’ubwo bamwe bikigoye kwemeza ko uwavuganye na BBC ari Hussein Radjab koko, hari hashize iminsi Umuiryango we ndetse n’uwamwunganiraga mu Mategeko, batangaje ko yaba yaranashimuswe ngo yicwe, ariko icyo kiganiro na none cyatumye bamwe basubiza agatima impembero, bemera ko yaba akiriho.