N’ubwo ishyaka rya CNDD-FDD rya Perezida Pierre Nkurunziza ritagaragaza aho rihagaze, haravugwa imyiteguro yo kumutanga nk’umukandida no kumwamamaza, ku buryo n’imyenda ishishikariza Abarundi kumutora, yavanywe mu mahanga, ariko iri shyaka rikabihakana.
Amakuru ishyaka CNDD-FDD ritemera avuga ko kongera kwiyamamaza kwa Perezida Nkurunziza kugeze kure, kandi ko n’imipira yanditseko "TORA NKURUNZIZA" yaba yaramaze gukoreshwa ku buryo ngo yagejejwe n’i Bujumbura.
Amakuru ahari avuga ko indege itwara imizigo yaguye ku kibuga cy’indege cya Bujumbura izanye iyi mipira mu byumweru bitatu bishize, ikaba yarimo amakontineri manini ane, apakiyemo imipira iriho ifoto ya Perezida Nkurunziza, yanditseho ngo "TORA NKURUNZIZA".
Kuri radiyo Bonesha FM, Willy Nyamitwe umujyanama mukuru wa Perezida Nkurunziza ushinzwe ibijyanye no gutangaza amakuru mu biro by’umukuru w’igihugu, akaba no mu itsinda rishinzwe gutegura amatora muri CNDD-FDD, yabeshyuje ayo makuru.
Yavuze ko abayatanga baba baritiranyije imipira yakoreshejwe mu matora yo mu mwaka wa 2010.
Kugeza ubu yaba Perezida Nkurunziza cyangwa ishyaka rya CNDD-FDD nta n’umwe werekana aho ahagaze kuri iki kibazo.
Bavuga ko niba Perezida Nkurunziza azongera kwiyamamaza ari ikibazo cy’Amategeko kizasubizwa na komisiyo ya CENI ushinzwe gutegura amatora, hamwe n’urukiko rwubahiriza Itegeko Nshinga.
Amashyirahamwe ashinzwe uburenganzira bwa muntu mu Burundi n’imiryango itandukanye yaba iy’imbere mu gihugu na mpuzaahanga bakomeje guteza ubwega ko batifuza ko Perezida Nkurunziza yongera kwiyamamaza muri manda itaha.
Ibihugu bitandukanye birimo Leta zunze ubumwe za Amerika, byatangaje ko bidashyigikiye ko Perezida Nkurunziza yakongera kwiyamamaza.
Russ Feingold, intumwa idasanzwe ya Barack Obama mu karere k’ibiyaga bigari aganira n’abanyamakuru yatangaje ko igihugu cye kidashyigikiye ko Perezida Nkurunziza yongera kwiyamamaza, kuko byabangamira inzira y’amahoro mu Burundi.
TANGA IGITEKEREZO