Mu kiganiro yagiranye na Ijwi rya Amerika Frederick Bamvuginyumvira, Visi Perezida w’ishyaka FRODEBU Nyakuri, yavuze ko kuba amatora yarigijwe inyuma ho icyumweru kimwe gusa bidahagije ngo impunzi z’abarundi ziri hanze zibe zatahutse.

Yavuze kandi ko muri icyo cyumweru kimwe ikibazo cy’ibitangazamakuru byafunzwe kitaba cyakemutse ngo n’abanyapolitiki bahunze babe bamaze kugaruka mu gihugu kugira ngo bitabire ayo matora.

Yagize ati: “ Birumvikana kwigiza inyuma itariki y’amarora icyumweru kimwe, ariko ntigihagije ngo habe hakemuwe ikibazo cy’intwaro zanyanyagijwe mu baturage. Ikindi kandi tugomba kugarura impunzi z’abarundi bahunze, ariko ntabwo byakorwa mu cyumweru kimwe gusa. Ntidushobora kandi no kwirengagiza abanyapolitiki bahunze igihugu ubu.

Frederic Bamvuginyumvira

Bamvuginyumvira yanavuze ko ishyaka rye rizitabira ibiganiro bihuza leta n’abatavuga rumwe na yo. Yavuze ko bagomba kwibutsa Perezida Museveni nk’umuhuza muri ibi biganiro ko amasezerano ya Arusha akwiye kubahirizwa.

Yagize ati “Icyo tuzi ni uko Museveni yitabiriye isinywa ry’amasezerano ya Arusha….icyo tuzakora ni ukumwibutsa tuti: uzi ko twemeranije ko hagomba kubaho leta ihuriweho n’amoko yose nta vangura iryo ari ryo ryose.”

Impamvu atanga yindi itazatuma bitabira amatora mu Burundi ni uko nta bitangazamakuru byigenga byakagombye kuzabafasha mu bikorwa byo kwitegura amatora.

Iri ni rimwe mu mashyaka yeruye akavuga ko atazitabira amatora nyuma y’uko yimuriwe kuya 21 Nyakanga.

Mu itangazo ryashyizweho umukono na Perezida w’u Burundi Pierre Nkurunziza, amatora yagombaga kuba ku itariki ya 15 Nyakanga yigijweho inyuma, ashyirwa kuya 21 Nyakanga nk’uko byari byasabwe n’abakuru b’ibihugu muri EAC uretse k obo basabaga ko yashyirwa kuwa 30 Nyakanga 2015.

[email protected]
Twitter: @Tukamwibonerale