CNDD FDD ishyaka riri ku butegetsi mu Burundi rirashinjwa kubiba amacakubiri mu baturage, nyuma y’ibaruwa, yatungaga agatoki bimwe mu bitangazamakuru n’indi miryango itegamiye kuri Leta, kugira uruhare mu gitero cyo mu Ntara ya Cibitoke.

Juvenal Havyarimana Umudepite uhagarariye CNDD FDD mu Ntara ya Bubanza, yasomeye mu ruhame ibaruwa ivuga ko abakeba b’ishyaka ahagarariye muri iyo ntara, ari amashyirahamwe adafite aho abogamiye mu bya Politiki, amaradiyo nka Isanganiro, Bonesha, RPA na Renaissance hamwe n’amahuriro y’anashyaka nka RANAC na ADC Ikibiri.

Muri urwo rwandiko rw’impapuro icyenda (9), Depite Havyarimana akaba yakomeje akangurira abaturage b’abarwanashyaka ba CNDD FDD (Abagumyabanga) kuba maso kuko ibihe biha ibindi, uko byari mu mwaka wa 2005 na 2010 bikaba bishobora gutandukana n’ibyo mu wa 2015.

Abayoboke ba CNDD FDD bagirwa inama yo kwitegura impinduka ngo kuko umwaka wa 2005, uwa 2010, ishobora gutandukana n'uwa 2015

Depite Havyarimana yakomeje avuga ko n’igitero cyabaye mu Ntara ya Cibitoke cyakwegekwa kuri abo yise abakeba b’ishyaka rya CNDD FDD abereye umurwanashyaka.

Ibyanditse bikanasomwa muri iyo baruwa, bamwe babifashe nko kubiba amacakubiri mu baturage.

Amashyirahamwe y’abanyamakuru, imiryango itegamiye kuri Leta n’andi adafite aho abogamiye muri Politiki, basanga ibyanditswe kandi bigasomwa na CNDD FDD mu Ntara ya Bubanza, ari ukujijisha abarundi, kuko hari ibindi bibazo biraje ishinga igihugu.

Alexandre Niyungeko Umuyobozi w'ishyirahamwe ry'Abanyamakuru

Alexandre Niyungeko Umuyobozi wa UBJ, asanga abavuga ko ibinyamakuru ari byo byateye igihugu, barabuze icyo bakora, agakomeza yemeza ko ibyo ari ibinyoma babashinja nkana, akavuga ko abavuze ibyo ari abashaka kwimena amaso.

Ishyirahamwe FORSC rivuga ko ishyaka CNDD FDD ryananiwe gutahura abateye igihugu none bakaba bashaka abo babyegekaho, agakomeza avuga ko uko bizagenda kose abateye mu Ntara ya Cibitoke bazamenyekana.

Vital Nshimirimana umuyobozi wa FORSC

Umucamanza Vital Nshimirimana usanzwe uyobora FORSC avuga ko muri iryo shyaka riri ku butegetsi barimo kurangaza abantu babajijisha kuko bafite ingorane zidasanzwe zijyanye na manda z’umukuru w’igihugu, akongeraho ko gutera igihugu nk’ibyabaye mu Cibitoke, nta nyungu babifitemo.

Mu ihuriro ry’amashyaka ADC Ikibiri ho, bavuga ko batagifite icyo bavuga, kuko babona ko aya matora asa n’aeimo gutesha abantu ubumuntu bwa bo.

Leonce Ngendakumana umukuru w’ihuriro ADC Ikibiri, avuga ko ishyaka CNDD FDD ridakwiye gutinya amatora, kuko bibaye rigatsindwa, abawurimo bazakomeza kubaho.

Leonce Ngendakumana uyoboye ihuriro ry'amashyaka aravuga rumwe n'ubutegetsi ADC Ikibiri

Leonce Ngendakumana agasaba umukuru w’igihugu Petero Nkurunziza guhanura abambari be, kwereka abaturage imigambi yo kuva mu bukene, kwivuza neza, kwiga neza aho kubazanamo izo nyigisho zibiba urwango.