Ibi yabitangarije i Bujumbura mu Burundi, nyuma yo kubonana na Perezida Pierre Nkurunziza, bakaganira ku mubano w’ibihugu byombi no ku matora ateganyijwe muri icyo gihugu muri Gicurasi uyu mwaka.

Mu kiganiro n’abanyamakuru, Perezida Kikwete yatangaje ko ushaka kwiyamamariza umwanya w’umukuru w’igihugu wese agomba kubahiriza Itegeko Nshinga ry’u Burundi ndetse n’amasezerano ya Arusha, hatirengagijwe n’Itegeko Nshinga mu buryo bwo kwirinda ko hazavuka imvururu.

Ku kuba hari abatakwishimira ibivuye mu matora cyangwa izindi mpaka, Perezida Kikwete yatanze inama z’uko haziyambazwa Inkiko aho kwiyambaza ingufu, nk’uko BBC, dukesha iyi nkuru, yabitangaje.

Nk’uko yababyibukije muri icyo Kiganiro, Perezida wa Tanzabia Jakaya Kikwete yari mu Burundi nk’Umuyobozi w’Umuryango wa Afurika y’Iburasirazuba (EAC), aho yari yitabiriye inama ya gatanu y’Abagize Inteko Ishinga Amategeko y’uwo muryango.

Amatora y’Umukuru w’igihugu mu Burundi ateganyijwe kuwa 26 Gicurasi uyu mwaka (2015), Perezida Nkurunziza akaba ashobora kongera kwiyamamariza uwo mwanya ashingiye ku Itegeko Nshinga mu ngingo ivuga ko manda z’umukuru w’igihugu zitarenga 2 z’imyaka 5 kuri buri imwe, kandi atowe n’abaturage.

Amashyaka atavuga rumwe n’Ubutegetsi, Imiryango Itegamiye kuri Leta, Sosiyete Sivili ndetse na Kiliziya Gaturika, bivuga ko adakwiye kongera kwiyamamaza, kuko yaba ibaye manda ye gatatu hashingiwe ku nmasezerano ya Arusha avuga ko manda zitagomba kurenga ebyiri arikjo ntavuge uburyo zitorerwa, kandi Loni ikavuga ko ayo masezerano ari yo akwiye gukurikizwa kuko ari yo yahagaritse intambara z’urudaca zari muri icyo gihugu.

Perezida Kikwete avuga ku matora yo mu Burundi mu nama y’Inteko Ishinga Amategeko ya EAC