Urukiko rukuru rwa Bujumbura rwemeje ko Pierre Claver Mbonimpa w’imyaka 65 afungurwa by’agateganyo nyuma y’aho isuzuma rya muganga kuwa Gatanu ryagaragaje ko ubuzima bwe butameze neza.

Mbonimpa wahise urekurwa kuri uyu wa Mbere, ni impirimbanyi y’uburenganzira bw’ikiremwamuntu mu Burundi, akaba ayobora ishyirahamwe ryitwa "Association for the Protection of Human Rights and Incarcerated Persons" (APRODH).

Pierre Claver Mbonimpa yabaye arekuwe by'agateganyo; azajya yitaba ubutabera avuye iwe mu rugo

Abanyamategeko bunganira Mbonimpa, imiryango itegamiye kuri Leta mu Burundi n’iyo ku rwego mpuzamahanga bari barakomeje gutera igitutu ubutabera bwo muri iki gihugu kurekura uyu mugabo agakurikiranwa ari hanze, herekanwa ko Mbonimpa arengeje imyaka 60 kandi ko yugarijwe n’uburwayi bwa diabete.

Mu ijambo yavuze mu nama ngarukamwaka ya "Clinton Global Initiatives" na Perezida Barack Obama wa Leta Zunze Ubumwe z’Amerika yavuze ko Mbonimpa ari ku rutonde rw’abantu bafunzwe bazira guharanira uburenganzira bwa muntu, asaba Leta y’u Burundi ko yamufungura mu maguru mashya.

Mbonimpa yafashwe kuwa 15 Gicurasi aregwa guhungabanya umutekano w’igihugu nyuma y’ibyo yatangaje ku maradiyo ko hari urubyiruko rw’u Burundi ruri muri Repubulika Iharanira Demokarasi ya Congo ruhabwa imyitozo ya gisirikare.

[email protected]