Umunyamakuru wa Televiziyo y’Igihugu cy’u Burundi n’umwarimu muri kaminuza baherutse gutabwa muri yombi n’inzego zishinzwe iperereza muri icyo gihugu, bashinjwa gufatanya n’umutwe wa M23 ukorera mu Burasirazuba bwa Congo Kinshasa.

Umunyamakuru wa Radio Televiziyo y’Igihugu cy’u Burundi Lucien Rukevya, yatawe muri yombi ku wa 13 Kamena 2013, ubu akaba ari mu maboko y’inzego z’igihugu zishinzwe ubutasi. Rukevya ashinjwa n’inzego z’ubutasi kuba baramubonanye n’umwe mu bakorana n’umutwe wa M23, ukorera mu Burasirazuba bwa Repubulika Iharanira Demokarasi ya Congo.

Nk’uko tubikesha Radio Ijwi rya Amerika, Lucien Rukevya ntari mu maboko y’inzego z’ubutasi z’igihugu cy’u Burundi wenyine kuko afunganye na Prof Ignace Bankamwabo Umwarimu muri Kaminuza, wigeze kuba Minisitiri muri icyo gihugu, na we ushinjwa kuba baramubonanye n’umuntu wo muri M23.

Isidore Rufyikiri umwunganizi mu mategeko wa Prof Ignace Bankamwabo, yatangarije Radio Ijwi rya Amerika ko ifatwa rya Bankamwabo, ashinjwa gufatanya n’umutwe wa M23 nta shingiro bifite, ahubwo ashobora kuba hari ibindi akurikiranweho ariko batifuza kugaragaza.

Akomeza angaza ko bandikiye umushinjacyaha mukuru basaba ko Prof Bankamwabo yarekurwa kuko uburyo yafashwemo butemewe n’amategeko kandi ibyo ashinjwa nta shingiro bifite. Agira ati “Tubonye ntacyo bakoze tuzitabaza urukiko rw’umuryango wa Afurika y’Iburasirazuba.”