Ni icyemezo cyatangajwe nyuma y’iminsi umunani urwo rukiko rwakiriye ikirego cya Ndayizeye n'Ihuriro ry'Amashyaka ya Politiki atavuga rumwe n'ubutegetsi ryitwa Kira-Burundi ryamutanzeho umukandida.

Komisiyo y’Amatora (CENI) yari yanze kandidatire ya Ndayizeye wayoboye u Burundi kuva mu 2003 kugeza 2005 akanaba Visi Perezida wabwo hagati ya 2001 na 2003.

CENI yari yatangaje ko atujuje umubare w’imikono y'abamushyigikiye ungana n’uw’abantu nibura 200 usabwa n’itegeko rigenga amatora ryatangajwe tariki 20 Gicurasi 2019 na Perezida Pierre Nkurunziza.

Ndayizeye yari yavuze ko umuntu yakwibaza uko yabura abantu 200 mu gihe ngo niyo bamusaba abantu 10,000 yababona mu masaha make.

Xinhua dukesha iyi nkuru yanditse ko nyuma yo kujuririra icyo cyemezo, urukiko rwasuzumye rusanga kandidatire ye igomba kwemerwa.

Ku rundi ruhande, kandidatire ya Niyonkuru Anicet, wo mu Ishyaka rya CDP (Coalition des patriots) n’iya Kavakure Valentin wo muri FPN (Front populaire national) zo zanzwe urukiko rwemeza umwanzuro wa CENI. Rwanatangaje ko rwakiriye inyandiko ya Bigirimana Jacques, wo muri FNL (Forces Nationales de Liberation) wakuyemo kandidatire ye.

Ndayizeye Domitien ari mu bakandida bane Komisiyo y’Amatora mu Burundi yari yatangaje ko batemerewe kwiyamamaza kubera batujuje ibisabwa. CENI yakiriye kandidatire icumi [zatanzwe hagati yo ku wa 25 Gashyantare no ku wa 5 Werurwe 2020] ariko muri zo hemejwe esheshatu gusa.