00:00:00 IGIHE NETWORK KN KINYARWANDA EN ENGLISH FR FRANCAIS

Centrafrique: François Bozizé n’abahungu be bari gukorwaho iperereza ku gushaka kuvutsa igihugu umudendezo

Yanditswe na Bukuru JC
Kuya 12 Mata 2021 saa 08:10
Yasuwe :
0 0

François Bozizé wahoze ari Perezida wa Centrafrique, abahungu be n’abandi bayobozi biganjemo abayoboye imitwe yitwaje intwaro bamaze igihe bakorwaho iperereza ku byaha bitandukanye birimo kubangamira umutekano w’igihugu no gushaka guhirika inzego zashyizweho.

Ubushinjacyaha bwa Centrafrique bumaze igihe mu iperereza bushaka kumenya ihuriro rya François Bozizé n’umutwe washinzwe mu Ukuboza umwaka ushize, Coalition des Patriotes pour la Centrafrique (CPC) ugizwe n’imitwe y’inyeshyamba yashakaga guhirika ubutegetsi mbere y’amatora yabaye muri uko kwezi.

Mu bo iperereza ryibanzeho uretse François Bozizé, harimo n’abandi batavuga rumwe n’ubutegetsi nka Anicet-Georges Dologuélé, Martin Ziguélé na Karim Meckassoua nkuko Jeune Afrique yabitangaje.

Mu bandi bantu bakozweho iperereza higanjemo abahoze ari abayobozi bakekwaho kwifatanya na CPC barimo Thierry Savonarole Maleyombo wahoze ari Minisitiri akaba n’umwe mu bayobozi bakuru b’Ishyaka Kwa Na Kwa ryahoze ari irya François Bozizé. Uyu yatawe muri yombi mu mpera z’umwaka ushize.

Maleyombo akekwaho kugambanira Leta no kubangamira ubusugire bw’igihugu, yifatanya n’imitwe yitwaje intwaro. Ubushinjacyaha buvuga ko hari ibimenyetso bwavanye muri hotel ye bigaragaza ko ari umwe mu bafatanyacyaha n’imitwe yitwaje intwaro.

Uyu mugabo bivugwa ko hari ibiganiro babonye yagiriye kuri WhatsApp bigaragaza ko hari inkunga yahawe na Jean Eudes Teya, Umujyanama wa François Bozizé ndetse na Abakar Sabone, icyegera cy’inyeshyamba nkuru Noureddine Adam.

Mu bari gukorwaho iperereza harimo n’abahungu ba François Bozizé barimo Jean-Francis, Rodrigue na Papy na mwishywa wa François Bozizé witwa Maxime Mokom wayoboye Umutwe wa Anti-balaka.

Ubushinjacyaha buvuga ko mu Ugushyingo umwaka ushize ubwo François Bozizé yamenyaga ko kandidatire ye itazemerwa, yahise ajya rwagati mu gihugu guhura n’imitwe yitwaje intwaro, basinyana ubufatanye bagamije guhirika ubutegetsi.

Bavuga ko ari icyaha gikomeye cy’ubufatanyacyaha mu gushaka guhirika inzego zemewe n’amategeko. Inyandiko z’ubushinjacyaha Jeune Afrique yabonye ngo zigaragaza ko nta gushidikanya Bozizé ari umufatanyacyaha.

Inyeshyamba za CPC Bozizé yari afatanyije na zo mu mpera z’umwaka ushize zari zigaruriye twinshi mu duce dukomeye mu gihugu ariko nyuma zaje gucika intege nyuma yo kotswa igitutu n’ingabo z’Umuryango w’Abibumbye ziri muri icyo gihugu ndetse n’izindi bihugu nk’u Burusiya n’u Rwanda.

François Bozizé n'abahungu barashinjwa kwifatanya n'imitwe igamije guhirika ubutegetsi bwemewe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .