Imirwano imaze iminsi itanu hagati y’abakilisitu n’abayisilamu muri Centrafrique, yahitanye abantu 28 nk’uko inzego z’umutekano muri iki gihugu zabishyize ahagaragara.

Iyi mirwano irabera mu gace ka Mala gaherereye mu birometero 300 uvuye mu murwa mukuru Bangui, ihuje abarwanyi ba Seleka n’abakilisitu bazwi ku izina rya “anti-Balaka”.

Iyi mirwano ikaze yatangiye tariki ya 1 Gicurasi, nyuma yaho abo muri “anti-Balaka” bagiye kwiba ibiribwa by’abo muri Seleka, ibi nibyo byatumye imirwano yaduka.

Augustin Ndoukoulouba wahoze ahagarariye agace ka Mala mu Nteko Ishinga Amategeko, yabwiye Ibiro Ntamakuru by’Abongereza (Reuters) ko iyi ntambara imaze iminsi itanu, imaze gutuma abantu 28 bamaze kwicwa barimo abasivile 22 n’abarwanyi batandatu bo muri Seleka.

Augustin Ndoukoulouba yakomeje avuga ko abaturage bamubwiye ko imibiri y’abishwe ikiri hirya no hino ku mihanda kuko nta buryo bwo kuyishingura buhari abakomeretse nabo bakaba badafite aho bajya kwivuriza.

Everaldo de Souza umwe mu bakirisitu uherereye mu mujyi wa Dékoa, aravuga ko abandi baturage 7 bishwe n’abahoze muri Seleka, ibi bikaba bivuze ko imibare y’abishwe muri iyi minsi irimo kwiyongera.

Imirwano ikaze hagati ya Seleka na “anti-Balaka” yadutse mu mwaka wa 2012 muri Centrafrique, abaturage benshi bamaze kwicwa, nubwo ingabo z’Ubufaransa zifashijwe n’izikomoka ku mugabane wa Afurika ziri muri iki gihugu kugerageza kugarura amahoro, kugeza ubu ntiziratanga icyizere ko gusubiranamo bishobora guhagarara vuba.