Abanyarwanda batuye Darfur ku wa Kane tariki ya 4 Nyakanga 2013, bizihije ku nshuro ya 19 umunsi wo kwibohora ndetse n’ubwigenge ku nshuro ya 51, aho bari bashyigikiwe n’abaturage ba Darfur ndetse n’ingabo n’abapolisi bari mu butumwa bwo kubungabunga amahoro aho i Darfur.

Uyu munsi wizihirijwe ahari ibirindiro bya Batayo ya 37 (RWANBATT 37) ikorera mu ikambi ya gisirikari iri El Fasher.

Mu kwizihiza umunsi wo kwibohora muri Darfur, umushyitsi mukuru yari intumwa nkuru ihagaraririye UNAMID Ambasaderi Hassan Djibril wari hamwe na Mohammed Ibin Chambas, bafatanyije mu kazi.

Umuyobozi wa Batayo ya 37 Colonel Ludovik Mugisha yavuze ko yishimira ibikorwa bya Batayo ayoboye, ndetse n’abanyarwanda bose muri rusange, bagaragariza i Darfur.

Col. Mugisha yanavuze ko ari ishema kuba u Rwanda rwaribohoye none rukaba rurimo no kugira uruhare rugaragara mu kugarura amahoro haba muri Afurika ndetse no ku Isi hose. Anavuga ko kuba Abanyarwanda bari i Darfur ari ikimenyetso cy’ubushake bwo gufasha abandi.

Avuga mu mwanya w’imbaga y’abanyarwanda bose bari muri Darfur, uhagarariye igipolisi cya UNAMID muri Darfur Cyprian Gatete, yashimiye abantu bose baje kwifatanya n’abanyarwanda kwishimira ukwibohora.

Aha akaba yarababwiye ati “Kwibohora byari mu mugambi wo gukiza Abanyarwanda ubuyobozi bubi bwaranze igihe cya mbere na nyuma y’ubukoloni, ubuyobozi bwamamaje urwango, irondakarere ndetse n’ingengabitekerezo mbi ya Jenoside, byaganishaga kuzarimbura igice kimwe cy’abaturage b’igihugu.”

Ambasaderi Hassan Djibril yashimye Abanyarwanda, ndetse ashima n’ubuyobozi bwabo bwabashije guhagarika Jenoside.

U Rwanda rwatangiye kugira uruhare mu butumwa bwo kubungabunga amahoro mu mwaka wa 2004 i Darfur mu burengerazuba bwa Sudan, mu butumwa bw’amahoro bwa Afurika yunze ubumwe, AMIS.

Kugeza ubu u Rwanda ni igihugu cya gatandatu ku Isi mu kugira abantu benshi mu butumwa bw’amahoro ku Isi hose, aho ubu rufite ingabo muri UNAMID, ndetse n’ahandi mu butumwa bw’amahoro bugera ku munani.

Amakuru dukesha Kalisa Sulaiman, umunyarwanda uba Darfur.

Ambasaderi Hassan Djibril ahabwa icyubahiro

Umuyobozi wa Batayo ya 37 Colonel Ludovik Mugisha

Uhagarariye igipolisi cya UNAMID muri Darfur, Senior Commissioner Cyprian Gatete