Inyeshyamba zo mu mutwe wa ADF-Nalu ukomoka muri Uganda zafashe agace ka Kamongo gaherereye muri km 80 uvuye mu mujyi wa Goma muri Repubulika Iharanira Demokarasi ya Congo zisahura ibiribwa n’imiti.

Nk’uko Jeune Afrique dukesha iyi nkuru yabitangaje, izi nyeshyamba zo mu mutwe wa ADF-Nalu (Forces démocratiques alliées – Armée de libération de l’Ouganda), zivuga ko zigamije kubohoza Uganda, zafashe agace ka Kamango gaherereye mu birometero 80 by’umujyi wa Goma.

Uyu mujyi wigaruriwe ku wa gatanu tariki ya 12 Nyakanga, ubwo ingabo za Monusco zitari muri aka gace.

Ingabo za Congo zikaba zavuze ko izi nyeshyamba zibasiye gusahura inzu z’ibiribwa n’iz’imiti, nk’uko byatangajwe na Col. Olivier Hamuli, umuvugizi w’izi ngabo muri Kivu y’Amajyaruguru n’iy’Iburasirazuba. Yakomeje avuga bamaze gusahura ibi byombi bahise basubira mu ishyamba.

Jean Paul Saambili, umuyobozi gakondo w’ubwoko bwa Watalinga yemereye ibiro ntaramakuru by’Abafaransa (AFP) ko izi nyeshyamba zihora muri ako gace zitera ubwoba abaturage, ku buryo zanasahuye ibitaro zikaniba n’abaturage. Abaturage bakaba bahise bahunga ako gace.

Umuvugizi w’ingabo za Uganda Paddy Ankunda, yemeje ko izi nyeshyamba zafashe uyu mujyi nyamara ko ingabo za Congo zawubatsimbuyemo. Yakomeje avuga ko izi nyeshyamba hari abo zafashe zikabica, barimo umuyobozi gakondo muri uyu mujyi n’ubwo abakozi batandukanye zari zafashe bavanwe mu maboko yazo.