Iri tangazo rishotse nyuma y’uko ibihugu bitandukanye bigize EAC byumvikanye bivuga ko imibare y’abanduye iri kuzamurwa n’abashoferi b’amakamyo n’abo baba bari kumwe babyinjiramo.

Minisiteri y’Ubuzima mu Rwanda ku wa Gatanu tariki 24 Mata, yerekanye ko abantu bashya banduye Coronavirus ari 22, ndetse ko ‘hagaragaye ubwiyongere bw’imibare y’abanduye mu batwara amakamyo yambukiranya imipaka n’abo bakorana’.

Mu kiganiro Minisitiri w’Umutekano muri Uganda, Gen Jeje Odongo yagiranye n’abanyamakuru mu minsi ishize, yavuze ko imibare mishya y’ubwandu bwa Coronavirus yazamuwe n’abashoferi b’amakamyo.

Nyuma y’amakuru avuga ko muri Uganda bashakisha abashoferi ngo babasubize mu bihugu byabo, Itangazo EAC yasohoye kuri uyu wa 27 Mata 2020 rivuga ko ‘buri gihugu kinyamuryango kigomba kuvura abashoferi n’abo bari kumwe bagaragayeho Coronavirus bakigezemo mu rwego rwo kwirinda ikwirakwira ry’icyo cyorezo”.
Ibihugu byanagiriwe inama yo gushyira mu kato k’iminsi 14 abagaragaza ibimenyetso bagakurikiranwa nk’uko biteganywa na Minisiteri y’Ubuzima muri icyo gihugu.

Abatwaye ibyo bicuruzwa basabwe kugenda bari hagati ya babiri na batatu habariwemo umushoferi.

Ibihugu byasabwe gushyiraho uburyo bwo kwishyurana ku mipaka budahererekanya amafaranga mu ntoki, ibigo by’itumanaho na banki bisabwa kugabanya ikiguzi cyo guhererekanya amafaranga mu rwego rwo korohereza abakoresha izo serivisi.

Ibihugu byasabwe gukomeza guhanahana amakuru ku bijyanye n’icyorezo cya Coronavirus. Kugeza ubu imibare ikomeje kwiyongera cyane mu bihugu bigize EAC.

Mu Rwanda abanduye bamaze kuba 207 mu gihe 93 bayikize, ntawe irahitana. Mu Burundi bamaze kuba 11, umwe niwe wapfuye naho bane barayikize.

Muri Tanzania abanduye ni 299 abapfuye ni 10 naho 48 bamaze kuyikira. Uganda abanduye ni 79 muri bo 46 barayikize ntawe irahitana. Muri Sudani y’Epfo ni batandatu nta wurayikira cyangwa ngo apfe ayizize. Muri Kenya ni 363 muri bo 14 yarabishe naho 114 bamaze kuyikira.