Ishami ry’Umuryango w’Abibumbye ryita ku buzima (OMS) riratangaza ko umubare w’abazira indwara ya Ebola ukomeje kwiyongera umunsi ku munsi. Imaze guhitana 887 muri Afurika y’i Burengerazuba.

Nk’uko France 24 ibitangaza , Banki y’Isi yatanze miliyoni 200 z’amadorali zo gufasha ibihugu byibasiwe n’iki cyorezo.

Mu bantu 1603 bari bayanduye, Ebola imaze guhitana abagera kuri 887 .Kuva kuwa 31 Nyakanga 2014 kugeza ubu, iyi ndwara imaze gutwara ubuzima bw’abantu 158.

OMS igaragaza ko muri Guinea iyi ndwara imaze gutwara ubuzima bw’abantu 358, Liberia imaze kwica 355, muri Sierra Leone273 naho muri Nigeria umuntu umwe akaba ari we yahitanye.

Ebola irasakara ku buryo bukabije muri Afurika y’Uburengerazuba kuva yagaragara muri Guinea mu ntangiriro z’uyu mwaka.

Kuwa Gatanu Tariki ya 1 Kanama 2014, Umuryango w’Abaganga Batagira Umupaka(Médecins sans frontiers) waburiye amahanga ko Ebola yarenze imipaka ku buryo bishoboka ko n’ibindi bihugu byaza gufatwa.

Ebola iragera amajanja Leta Zunze Ubumwe za Amerika

Ibitaro bya Mont Sianai muri New York byatangaje ko byakiriye umugabo ufite ibimenyetso bya Ebola hakaba hari gusuzumwa niba koko yarafashwe n’iyi virusi.

7sur7 itangaza ko mu gitondo ku itariki ya 4 Kanama Ibitaro bya Mont Sinai byakiriye umurwayi ufite umuriro ukabije akaba yari amaze igihe gito avuye muri Afurika y’Uburengerazuba ari naho Ebola yiganje cyane.

Ibitaro bya Mont Sinai muri New York

Uyu murwayi yakuwe mu bandi ashyirwa ukwe kugira ngo basuzume nibaba koko ari Virus ya Ebola yanduye.

Mu mpera z’icyumweru gishize, umuganga w’umunyamerika Kent Brantly wanduriye Ebola muri Liberia yoherejwe iwabo kugira ngo abe ariho avurirwa.

Nacny Writebol, umuvugabutumwa w’umunyamerika , na we yanduriye muri Afurika na we akaba agiye kujya kuvurizwa iwabo.

Mu Rwanda, Minisiteri y’Ubuzima yafashe ingamba zikaze ngo irinde Igihugu iki cyorezo. Ku bufatanye n’Ikigo y’Igihugu cy’Ubuzima (RBC) yatangaje ko ku kibuga cy’indege hashyizwe imbangukiragutabara izajya ikora amasaha 24 buri munsi, mu rwego rwo kwirinda ko hagira uwo virusi ya Ebola igaragaraho akabura abamwitaho mbere yo kwanduza abandi.