Kenya yari imaze imyaka iyoboye ubukungu bwa Afurika y’Iburasirazuba, mu mwaka ushize yagize umusaruro mbumbe wa miliyari $68.91 ugererayije na miliyari $63.62 zabaruwe mu 2015, ndetse uyu mwaka biteganywa ko zizagera kuri miliyari $75.

Byatumye Ethiopia ishyiramo ikinyuranyo cya miliyari $3.6, ihita iza ku mwanya wa mbere muri Afurika y’Iburasirazuba.

Iterambere rya Ethiopia rishingirwa ahanini ku mbaraga zikomeje gushyirwa mu mishinga y’ibikorwaremezo bya leta birimo imihanda y’imodoka, iya gari ya moshi n’amashanyarazi no guteza imbere isoko ryo mu gihugu.

Icyo gihugu kandi cyagize n’izamuka rikomeye ry’ubukungu ryageze ku 10.8 % guhera mu 2005, bituma kibasha guha Kenya intera ifatika.

Ethiopia iri kuzamura cyane nk’urwego rw’amashanyarazi, aho nk’u Rwanda ruteganya kuzavanayo megawati(MW) 400 kimwe na Tanzania. Mu Ukuboza umwaka ushize nibwo yatashye urugomero rwatwaye amadolari y’Amerika miliyari 1.57 ku mugezi wa Omo mu Majyepfo y’igihugu, rwatumye amashanyarazi igihugu gifite yikuba kabiri akagera kuri MW 4,238.

Muri gahunda y’iterambere rya Ethiopia hagati ya 2015-2020, ishaka kuba yageze ku mashanyarazi angana na MW 17,346.

Ni inzozi zizaba impamo biturutse ku mishinga ikomeye y’amashanyarazi, nk’uwa rutura uri kubakwa ku ishami ry’uruzi rwa Nil (ku mugezi uba ugisohoka mu kiyaga cya Tana muri Ethiopia mbere y’uko uhura n’uva muri Victoria bigatanga Nil). Uyu umushinga uzwi nka Grand Ethiopian Renaissance Dam uzuzura utwaye miliyari 4.1 $, ukazatanga MW 6,450.

Addis Ababa muri Ethiopia