Iki gikorwa cyatangajwe ku wa Gatanu tariki ya 7 Mutarama 2022 nyuma y’amezi 14 y’intambara mu Majyaruguru ya Ethiopie yahanganishije TPLF n'ingabo za leta ariko umwaka ushize ukaba warasize ingabo za leta zisubije imijyi TPLF yari yarigaruriye.

Ibiro bishinzwe itumanaho muri Guverinoma ya Ethiopie byatangaje ko izakora ibishoboka byose kugira ngo habeho ibiganiro biganisha ku bumwe burambye, izo mbabazi zikaba ziri mu by'ibanze bitegura ibiganiro by'impande zombi.

Bigira biti “ Izi mbabazi zigamije guharura inzira y’ibisubizo birambye mu mahoro ku bibazo bya Ethiopie.”

Ku rutonde rw’abahawe imbabazi harimo abayobozi ba TPLF kimwe n’abo mu bwoko bwa Oromo na Amhara nk’uko inkuru ya France24 ibivuga ariko umubare w’abahawe izo mbabazi ntiwahise utangazwa.

Minisitiri w’Intebe, Abiy Ahmed na we yavuze ko bikwiye kwimakaza ubumwe n’ubwiyunge mu ijambo yavuze ubwo aba-Orthodox bizihizaga Noheli.

Intambara yo muri Tigray yatwaye ibihumbi by’abaturage isiga abandi benshi bugarijwe n’inzara.