Itangazo ry’ibiro by’Umukuru w’Igihugu rivuga ko abaturage babwiwe ko Gambia yakiriye amakarito ya COVID-Organics yavuye kuri Perezida wa Madagascar, Andry Rajoelina.

Perezida Andry Rajoelina avuga ko uyu muti uvura umuntu wanduye Coronavirus mu minsi irindwi.

Iki gihugu kimaze iminsi mu bukangurambaga bw’uyu muti cyakoze, aho cyemeza ko uvura ukanarinda uwawukoresheje kwandura Coronavirus.

Gambia ivuga ko “Uyu muti uri mu yo Madagascar yageneye ibihugu byo muri ECOWAS mu kurwanya Coronavirus, ubu wamaze gushyikirizwa Minisiteri y’Ubuzima.”

Amakuru avuga ko uyu muti wagejejwe mu Murwa Mukuru Banjur, wakirwa n’abayobozi bakomeye mu gihugu.

Abantu 23 bamaze kwandura Coronavirus muri Gambia, umwe amaze gupfa naho 10 bamaze gukira.

Kugeza ubu ntabwo uwo muti uremezwa n’Umuryango Mpuzamahanga wita ku Buzima (OMS) ariko byinshi mu bihugu bya Afurika bikomeje kuwusaba ngo biwifashishe mu kuvura abarwayi ba Coronavirus, harimo na Tanzania iherutse kuwakira.

Mu kiganiro Andry Rajoelina yagiranye na France 24, yavuze ko impungenge zose zigifitwe kuri uwo muti ari uko wavumburiwe muri Afurika, ati “iyo uba wavumburiwe mu Burayi, ubu nta mpungenge ziba zihari.”

Andry Rajoelina yavuze ko umuti igihugu cye cyavumbuye bawizeye neza kandi abawukoresheje bakira.

Uyu muti wa Madagascar uturuka mu kimera cyitwa artemisia gisanzwe cyifashishwa mu gukora imiti.

Gambia yakiriye umuti uvugwaho kuvura Coronavirus wakozwe na Madagascar