Bivugwa ko Gen Ndayikengurukiye yajyanywe muri Gereza ku wa Kane w’iki cyumweru.

Jean Bosco Ndayikengurukiye yahoze ayoboye CNDD-FDD ku rugamba.

Muri 2003 yaragarutse mu Burundi, ayobora ishyaka KAZE-FDD. Muri 2015, Gen Ndayikengurukiye yari mu bamaganye manda ya gatatu ya Perezida Nkurunziza bimuviramo guhunga igihugu ariko aza gusubirayo mu 2021.

Akurikiranyweho icuruzwa ry’ibikomoka kuri peteroli mu Burundi mu buryo butemewe.
Nubwo nta rwego rw’ubuyobozi rwigeze rutanga amakuru ku bijyanye na dosiye y’uyu mugabo, amakuru yagiye hanze avuga ko akurikiranyweho ibyo byaha.

Nubwo hari abandi bantu bafite ibibazo bimwe ariko ni we wenyine wajyanywe muri Gereza ya Mpimba, ndetse bikorwa atabanje kunyuzwa kuri sitasiyo ya polisi.

U Burundi bwagize ikibazo gikomeye cy’ibura ry’ibikomoka kuri peteroli mu myaka irenga ine.

Bamwe mu bacuruzi banini batangiye kwerekeza amaso muri RDC no muri Tanzania mu rwego rwo gushakayo ibikomoka kuri peteroli, bikavugwa ko na Ndayikengurukiye yayobotse izo nzira atangira gucuruza lisansi yakuye muri RDC.

Nk’uko Ubushinjacyaha bubisobanura uwavuzwe muri ubwo buryo, aba akurukiranyweho guhungabanya ubukungu bw’igihugu.

Gen Ndayikengurukiye yabaye Umusirikare mu Ngabo z’u Burundi, nyuma y’urupfu rwa Melchior Ndadaye mu 1993.

Yinjiye mu nyeshyamba aza kuyobora CNDD-FDD mu 1998 nubwo nyuma yaje gukurwa ku buyobozi ashinga irindi shami ryayo ryitandukanyije na yo.

Yasubiye mu Burundi mu 2021 nyuma y’uko Perezida Ndayishimiye amwijeje umutekano.

Gen Jean Bosco Ndayikengurukiye wayoboye CNDD-FDD arafunzwe