Umwe mu itsinda ry’abaganga boherejwe n’igihugu cya Cuba guhangana na Ebola muri Guinea yishwe na Malariya ku cyumweru.

Minisiteri y’ubuzima ya Cuba yatangaje ko Jorge Juan Guerra Rodriguez, w’imyaka 60 yishwe na Malariya y’Ubwonko nyuma yo gupimwa ntasangwemo Ebola.

Ikinyamakuru La Havane cyatangaje ko Rodriguez yageze muri Guinea ku wa 6 Ukwakira akarwara ku ya 22.

Umuyobozi w’ibikorwa byo kurwanya Ebola muri Guinea, Dr Sakoba Keïta avuga ko Rodriguez ntaho yigeze ahurira n’abarwayi ba Ebola, cyangwa aho bayivurira.

Yanavuze ko nyakwigendera arahambwa mu murwa mukuru wa Guinea, Conakry, minisiteri y’Ububanyi n’amahanga ya Cuba imaze gutanga uburenganzira.

Cuba nobyo gihugu cyatanze abaganga benshi mu kurwanya Ebola, cyohereje itsinda ry’abaganga n’abakozi 256 mu bikorwa byo gukumira Ebola muri Afurika y’Uburengerazuba.