Ni icyorezo kirangiye kimaze guhitana abana basaga ibihumbi birindwi. Icyakora inzobere mu buzima zivuga ko uwo mubare ushobora kuba urenga, kubera ko hari abashobora kuba baragiye bapfa ntibimenyekane, kuko bose batajyanwaga kwa muganga.

Mu kiganiro yagiranye n’abanyamakuru mu murwa mukuru Kinshasa, Minisitiri w’Ubuzima Eteni Longondo, yemeje ko nta seru ikirangwa muri Congo.

Nubwo nta nzego zishinzwe ubuzima ku rwego mpuzamahanga zirabyemeza, iri tangazo rya Congo rije nyuma y’ubukangurambaga bwo gukingira iseru bwakozwe umwaka ushize, aho abana basaga miliyoni 18 bakingiwe.

Iseru ni icyorezo cyakunze kwibasira Congo mu myaka icumi ishize, gusa byarushijeho kuba bibi guhera muri Kamena umwaka ushize, bikubitana nuko icyo gihugu gifite inzego z’ubuzima zisanzwe zidakomeye.

Uwo mwaka kandi nibwo inzego z’ubuzima muri icyo gihugu zahanganaga n’ibindi byorezo nka Ebola, Cholera, Coronavirus n’ibindi.

Iseru yari imaze iminsi yica abana benshi muri Congo