Gahunda ya AGOA (African Growth and Opportunity Act) yemejwe na Perezida Bill Clinton mu 2000 ikaba irimo ibihugu bigera kuri 38.

Ni gahunda iha amahirwe ibihugu bitandukanye byo muri Afurika yo munsi y’ubutayu bwa Sahara yo gukorana ubucuruzi na Amerika, ibicuruzwa bikorerwa muri ibyo bihugu bifungurirwa amayira nta musoro. Ibyo ni nk’imyenda, ikawa, ibiribwa n’ibindi bikomoka ku buhinzi.

Amerika yakuye Uganda muri AGOA hamwe n’ibindi bihugu bitatu bya Afurika birimo Centrafrique, Gabo na Niger uhereye ku ya 1 Mutarama, ibituma Uganda itazashobora kohereza mu mahanga bimwe mu bicuruzwa idasoreshejwe.

Ingaruka uyu mwanzuro uzagira zishobora no kurenga Akarere ka Afurika y’Iburasirazuba nk’uko impuguke zibibona ndetse Kenya na Tanzania bizungukira muri ako kavuyo nibiramuka bishyizeho ingamba zo kureshya ibigo by’Abanyamerika byakoreraga muri Uganda.

Uganda yoherezaga ku isoko ryo muri Amerika ibicuruzwa birimo ikawa, amabuye y’agaciro, imitako n’ibindi. Ku rundi ruhande yakuragayo inyongeramusaruro zikoreshwa mu buhinzi, indege, imashini, ibikoresho by’amashanyarazi n’ibikoresho byo mu buvuzi.

Umujyanama wa Perezida wa Uganda mu by’ubucuruzi, Susan Muhwezi, yatangaje ko gukura Uganda muri AGOA bizazambya imibereho y’abakora mu nganda n’abacuruza ikawa, cotton n’ibindi bicuruzwa kandi bizahungabanya uburenganzira bwa muntu.

Mu mwaka ushize w’ingengo y’imari, ibicuruzwa Uganda yohereje muri Amerika binyuze muri AGOA byari bifite agaciro ka miliyoni 8,2 z’amadolari ya Amerika ugereranyije n’ibya miliyoni 70,7 z’amadolari byoherejwe muri Amerika muri rusange.

Nk’uko bigenwa n’amategeko ajyanye n’inkomoko y’ibicuruzwa muri AGOA, Amerika ishobora gufata icyemezo cy’uko nubwo byanyura muri RDC, Kenya cyangw aTanzania, bitazemererwa kugurishwa ku isoko ryayo mu gihe byaba bikomoka muri Uganda.

Ibyo bizatuma bimwe mu bigo bishaka uko byakwimuka, ibicuruzwa byabyo bikajya bigurishwa biturutse muri Kenya, Tanzania cyangwa mu Rwanda aho kuba muri Uganda nk’uko inzobere mu bucuruzi mpuzamahanga, Nelson Ndirangu, yabwiye The Eastafrican dukesha iyi nkuru.

Leta Zunze Ubumwe za Amerika itanga inkunga ifatika mu rwego rw’ubuzima muri Uganda irenga miliyono 950 z’amadolari buri mwaka.

Minisitiri w’Ubucuruzi muri Uganda, Francis Mwebesayatangaje ko iki gihugu kizakomeza guhagarara bwuma.

Ati “Tuzakomeza kwihagararaho, nta gushidikanya. Nta kibazo na kimwe Uganda izahura na cyo kuko dufite ibyo dushingiraho muri Uganda.”

Mwebeya yavuze ko Uganda ishobora gushakishiriza mu masezerano y’ubucuruzi yashyizeho umukono hagati ya Kenya-EAC n’u Burayi (Kenya-EAC-European Union Economic Partnership Agreement).

Uganda yakuwe muri AGOA kubera itegeko rihana abaryamana bahuje ibitsina