Katumbi na Tshisekedi bahuriye i Paris kuri uyu wa Kane tariki ya 10 Ukuboza, bavuga ko bagamije kwigira hamwe uburyo bakwitegura amatora ndetse n’uburyo bafatanya gukumira ko Perezida Joseph Kabila uri ku butegetsi yakongera kwiyayamamaza dore ko Itegeko Nshinga ritabimwemerera.

Katumbi na Tshisekedi bavuze ko igikenewe cyane ari uko habaho isimburanwa ku butegetsi muri 2016 nk’uko Itegeko Nshinga ribiteganya.

Bongeyeho ko bishoboka cyane ko amashyaka yabo yazashyigikira umukandida umwe ariko birinda kuvuga amazina ye. Bashishikarije amashyaka yose yifuza impinduka kwinjira muri iri huriro.

Moise Katumbi ni umuherwe kandi ukunzwe cyane muri Repubulika Iharanira Demokarasi ya Congo. Yahoze ayobora intara ikize ku mutungo kamere ya Katanga. Aherutse gutangaza ko yitandukanyije na Perezida Joseph Kabila ndetse asezera no mu ishyaka rye rya PPRD.

Félix Tshisekedi ni umuhungu wa Etienne Tshisekedi, washinze ishyaka rya UDPS ritigeze rivuga rumwe n’Ubutegetsi.

Usibye kuba Umunyapolitiki, Katumbi ni nyir'ikipe y'umupira w'amaguru ikunzwe ya Tout Puissant Mazembe