Abantu bane bagaragaye bari mu bagera kuri 372 basuzumwe mu masaha 24 ashize. Batatu muri bo ni abanya-Kenya mu gihe undi ari umunya-Pakistan uherutse kujya muri Kenya. Umwe muri abo barwayi b’abanya-Kenya yari aherutse mu rugendo muri Malawi, mu gihe abandi babiri bayanduriye imbere mu gihugu.

Minisitiri w’Ubuzima Mutahi Kagwe yavuze ko Guverinoma imaze gusuzuma abagera 1886 mu 2050 bashyizwe mu kato ahantu hatandukanye mu gihugu. Yavuze ko basabye abaganga kongera akato ku bantu bahuye n’abanduye ahwitura n’abatari gukurikiza amabwiriza yo kutegerana no gukoranaho.

Abarwayi bari kujyanwa kwitabwaho, ndetse ngo hari kurebwa uburyo bamwe babonera ubufasha bwa ngombwa mu ngo zabo. Minisitiri Kagwe yasabye umuntu wese ujya ahahurira abantu benshi kwambara agapfukamunwa mu rwego rwo kwirinda ikwirakwira ry’icyo cyorezo.

Yavuze ko ubu Kenya iri kwikorera bimwe mu bikoresho byo kurinda abaganga bayo bari guhangana n’icyo cyorezo. Laboratwari z’ikigo cy’ubushakashatsi cya Kenya (KEMRI), ziri gukora ku buryo zitangira gukora ibikoresho byo gusuzuma kugira ngo abantu benshi basuzumwe muri icyo gihugu.

Ubu Kenya ifite abantu 126 bagarageyeho coronavirus, bane bamaze gupfa abandi bane bakize. Icyorezo gikomeje kwiyongera mu bihugu bigize Umuryango wa Afurika y’Iburasirazuba. Mu bindi bihugu, u Burundi bufite batatu yagaragayeho ntawe urakira cyangwa ngo ahitanwe nayo, u Rwanda ni 89 naho natwe urakira cyangwa ahitanwe nayo.

Tanzania ni 20 yagaragayeho, umwe yarapfuye batatu barakize. Sudani y’Epfo nta bwandu buragaragara, naho Uganda ni 48 ntawe urayikira nta n’uwo irahitana.

Muri Kenya abanduye Coronavirus bageze ku 126