Abakozi batandukanye barimo abapolisi bari ku kibuga cy’indege Mpuzamahanga cya Kenya igihe cyashyaga, bakurikiranweho gusahura iki kibuga babifashijwemo n’akavuyo kariyo mu gihe cyafatwaga n’inkongi y’umuriro.

Uretse abapolisi, abakozi bo mu biro bishinzwe abinjira n’abasohoka n’abandi batandukanye bakora ku kibuga mpuzamahanga cy’indege cya Kenya, barimo guhatwa ibibazo ku ruhare bakekwaho rw’ubusahuzi iki kibuga, mu gihe cyari cyibasiwe n’inkongi y’umuriro.

Umwe mu bayobozi barimo guhata ibibazo abakekwa, waganiriye n’ibiro ntaramakuru by’u Bufaransa, AFP, yagize ati "hari bamwe mu bakora kuri iki kibuga bahise birukankira mu gusahura, aho kuburira abantu. Twabahase ibibazo bose, baba abapolisi bakuru, abakozi muri biro bishinzwe abinjira n’abasohoka n’abandi bakozi bo kuri iki kibuga.” Mu bakekwa kandi harimo abashoferi ba tagisi zikorera kuri iki kibuga.

Gusa ngo ntibazatinda kumenyekana, kuko hari ibyuma bifata amafoto byari kuri iki kibuga zabitse amakuru yose y’iri sahura. Aha yahise ahahera avuga ko hari n’abazemera uruhare rwabo, cyane ko hari ibimenyetso bizashyirwa ahagaragara n’ibi byuma.

Kimwe mu bitangazamakuru byandikirwa muri iki gihugu, cyavuze ko abapolisi bakuru barindwi bakekwaho iri sahura, bazagezwa imbere y’ubutabera ku wa mbere w’icyumweru gitaha.

Ibyasahuwe birimo ibintu bitandukanye birimo amafaranga n’inzoga byari mu nzu z’ubucuruzi ziri kuri iki kibuga, byanabonanywe abantu babifite.

Iki kibuga cy’indege, Jomo Kenyatta international Airport (JKIA) cyafashwe n’inkongi y’umuriro mu rukerera rwo ku itariki ya 7 Kanama 2013. Kugeza ubu icyateye iyi nkongi ntikiramenyekana.

Perezida Uhuru Kenyatta wa Kenya, yatangaje ko iki gikorwa nta sano gifitanye n’abiyahuzi bakora ibikorwa by’iterabwoba. Gusa yasabye ko abazafatwa babigizemo uruhare bazahanwa bikomeye.