Abanya-Kenya basabye IMF guhagarikira igihugu cyabo inguzanyo

Yanditswe na Mutangana Gaspard
Kuya 6 Mata 2021 saa 02:35
Yasuwe :
0 0

Abaturage bo muri Kenya batangiye gusinya urwandiko (petition) basaba Ikigega Mpuzamahanga cy’Imari (IMF) guhagarikira igihugu cyabo inguzanyo kubera ruswa ikomeje kwiyongera.

Binyuze mu nteruro (hashtag) kuri Twitter bise #StopLoaningKenya, Abanya-Kenya batangiye gusaba bagenzi babo gusinya kuri iyo nyandiko ari nako bongeraho ibindi bikorwa bibi Guverinoma yabo ikora bitayemerera guhabwa izindi nguzanyo.

Uko kwivumbura kubaye nyuma y’iminsi mike IMF yemereye Kenya inguzanyo ya miliyari 2.4 z’amadolari azayifasha guhangana na Covid-19.

Ikinyamakuru Daily Nation cyatangaje ko mu mwaka umwe, amadeni Kenya yari ifite yiyongereyeho miliyari zisaga icyenda z’amadolari. Ni mu gihe Perezida Uhuru Kenyatta aherutse gutangaza ko igihugu buri mwaka gihomba miliyoni 18 z’amadolari kubera ruswa.

Petition imaze gusinywaho n’abarenga ibihumbi 142 mu minsi ibiri gusa. Mu batanze ibisobanuro, bavuze ko Kenya yakiriye inkunga nyinshi zo guhangana n’icyorezo cya Covid-19 ariko nta musaruro zatanze mu baturage.

Ibi kandi bikajyana n’uko bamwe mu bayobozi bakuru ba Kenya, barimo n’abari hafi na Perezida Uhuru Kenyatta, bakunze kumvikana mu bikorwa bya ruswa muri ibi bihe bya Covid-19, cyane cyane nyuma y’uko Kenya yabaga imaze kwakira inkunga za IMF na Banki y’Isi.

Uwitwa Dennis yanditse ku rubuga rwa Facebook rwa IMF ko iryo deni ntacyo rimaze.

Yagize ati "Ikibazo cyakabaye kwibaza icyo IMF igamije mu gukomeza guha amadeni Kenya buri gihembwe kandi izi neza ko amafaranga atangwa atabyazwa umusaruro. Ayo madeni nagera igihe cyo gutangira kwishyurwa, muzajye kwishyuza abayafashe."

Victor Bett yagize ati "IMF ntirimo kuzuza inshingano zayo kuko irimo gutanga amadeni ku banyapolitiki barya ruswa. Ubu dufite ikibazo cy’amadeni yafashwe turi kwishyura binyuze mu kongera umusoro w’ibicuruzwa nkenerwa kugira ngo twishyure ayo madeni. Mwe gukomeza kudushyira mu kaga twe n’urubyaro rwacu."

IMF ivuga ko ideni rya Kenya ridateye impungenge kuko ringana na 70% by’umusaruro mbumbe w’igihugu, gusa ko rikwiye kugenzurwa neza kuko nta gikozwe rishobora kubangamira ubukungu bw’igihugu.

IMF yasabwe guhagarika ideni igiye guha Kenya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .