Fouad Mohamed Khalaf umwe mu bakuru b’umutwe w’inyeshyamba za Al-Shabaab, yatangaje ko bategura kongera kugaba ibitero i Nairobi mu Murwa Mukuru wa Kenya.

Nk’uko tubikesha Ibiro Ntaramakuru by’Abongereza (Reuters), Fouad Mohamed Khalaf yemeje ibi bitero nyuma yo kugaragaza neza ko igitero cyagabwe ku nyubako nini y’Ubucuruzi ya Westgate tariki ya 21 Nzeri 2013 ahagana saa tanu z’amanywa.

Kuri uyu wa kane tariki 22 Gicurasi ni bwo Fouad yatangaje ku rubuga rwa interineti agira ati “ Twerekeje intambara yacu i Nairobi.”

Yakomeje agira ati “Banyakenya, mutegereze ibitero by’ubwiyahuzi bigiye gukorwa n’ingimbi z’abayisiramu, haba mu buryo bw’ituritswa ry’ibisasu cyangwa ubw’mirwano”.

Fouad yakomeje asaba abayisiramu bo muri Kenya gukomeza kubafasha muri uyu mugambi.

Igihe inzu y'ubucuruzi ya Westgate yaterwaga mu 2013/ Photo internet

abarwanyi ba Al-Shabaab bamaze imyaka isaga irindwi bahanganye na Guverinoma ya Somaliya, bakaba bararakajwe cyane no kubona abasirikare bo muri Kenya basaga 4 000 barahereye mu mwaka wa 2011 babungabunga amahoro mu Majyepfo y’iki gihugu.

Uyu mutwe wa Al-Shabaab wemeza ko ari byo byabaye intandaro yo kugaba ibitero muri Kenya guhera ku Nzu y’Ubucuruzi ya Westgate yaguyemo abasaga 68 abandi benshi bagakomereka bitewe babangamiwe bikomeye n’izi ngabo mu Ihembe rya Afurika.