Igisirikare cya Kenya ku wa 05 Ukwakira 2013, cyatangaje amazina y’abantu bane bakekwaho kuba baragabye igitero kuri Westgate Mall i Nairobi kigahitana abantu 67.

Ayo mazina yatangajwe ni Abu Baara al-Sudani, Omar Nabhan, Khattab al-Kene na Umayr.

BBC dukesha iyi nkuru yanditse ko nta bindi bisobanuro byatanzwe ku birebana n’abo bagabo, ariko Kenya iherutse kuvuga ko intagondwa ziri hagati ya 10 na 15 ari zo zari muri icyo gitero.

Intagondwa zo mu mutwe wa Al –Shabaab ziyemereye ko arizo zagabye icyo gitero cyabaye ku wa 21 Nzeri 2013.

Uyu mutwe wa Al–Shabaab ukorana n’umutwe w’iterabwoba wa Al-Qaeda, wavuze ko wagabye icyo gitero kubera Kenya yohereje abasirikare muri Somalia kuwurwanya.

Itangazwa ry’amazina y’abo bantu bane ribaye mu gihe amashusho ya camera zicunga umutekano yari amaze gushyirwa ahagaragara, yerekana abagabo bane bagabye igitero barimo bagenda muri iyo nzu y’ubucuruzi, bafite imbunda zirasa amasasu y’urufaya.