Ubwo bitabaga urukiko rwa Nairobi kuri uyu kane, Abanyasomaliya bane n’ umwe ukomoka muri Tanzaniya bahakanye ibyaha by’ iterabwoba baregwa.

Mu gitondo cyo kuwa 2 Mata 2015, abantu bane bo mu mutwe wa Al Shabaab bitwaje intwaro binjiye muri kaminuza ya Garissa, bagaba igitero cyamaze amasaha menshi.

Ubushinjacyaha bwabwiye urukiko ko aba uko ari batanu bagize uruhare muri iki gitero, nubwo butasobanuye neza uruhare rwabo, bunasaba urukiko ko badakwiye kurekurwa by’ agateganyo.

Umucamanza Daniel Ochenja yategetse ko basubizwa muri gereza kugeza kuwa 11Kamena,ubwo urukiko ruzafata umwanzuro niba barekurwa cyangwa se bafungwa by’ agateganyo.

Abaregwa bavuze ko imitwe yabo yashyizwe kenshi mu ndobo zuzuye amazi, bakubitishwa amashanyarazi ndetse bababazwa bikomeye na polisi ishinzwe kurwanya iterabwoba, ibahatira kwemera ibyo baregwa.

Al-Shabab yatangaje ko izakomeza kugaba ibitero muri Kenya kubera umwanzuro iki gihugu cyafashe wo kohereza ingabo muri Somalia ngo zijye guhashya uyu mutwe witwaje intwaro mu mwaka wa 2011.