Ibice bitandukanye birimo Umujyi wa Nairobi, Rift Valley, Mt Kenya n’igice cy’uburengerazuba bwa Kenya ku mugoroba wo mu ijoro ryo ku Gatanu tariki ya 25 Kanama 2023.

Bamwe mu bagenzi batangarije ikinyamakuru Nation.Africa ko umuriro ku kibuga cy’indege wabuze guhera saa 9:45 z’ijoro kugera 11:50.

Umunyamabanga ushinzwe Ubwikorezi, Kipchumba Murkomen yasabye abagenzi imbabazi kubera ibibazo bahuye na byo biturutse ku ibura ry’umuriro yizeza ko bagiye kubikurikirana ku buryo bagomba guhura n’ababishinzwe.

Ati “Mbasabye imbabazi ku byabereye kuri Jomo Kenyatta International Airport kubera ibura ry’umuriro n’umwijima ukomeye. Nta kindi twavuga nta n’impamvu ihari yatuma ikibuga cy’indege cyisanga mu mwijima.”

Yongeyeho ati “Ndaza gutangaza icyemezo cyafashwe nyuma yo guhura n’ubuyobozi bw’ikibuga mpuzamahanga cy’indege. Na none mbasabye imbabazi.”

Urwego rw’Igihugu rushinzwe Ingufu muri Kenya, rwagaragaje ko rufite ikibazo gikomeye cy’ibura ry’umuriro mu bice bitandukanye by’igihugu nyuma y’ikibazo tekiniki cyagize ingaruka mu miyoboro y’amashanyarazi ibiri migari.

Iyo miyoboro ni yo yifashishwaga mu gusaranganya amashanyarazi mu bice bya Nairobi, Rift Valley, ibice by'Iburengerazuba bwa Kenya n’Igice cy’Amajyefo ya Nyanza.