Icyegeranyo cy’Imiryango Amnesty International na Human Rights Watch kivuga ko abishwe babarirwa muri 50 cyane cyane mu Murwa Mukuru Nairobi.
Ubwo abaturage bigaragambyaga, Polisi n’izindi nzego z’umutekano zashatse kubatatanya, barahangana mu duce twa Mathare, Kibera, Babadogo, Dandora, Korogocho, Kariobangi, Kawangware.
Iyi miryango ivuga ko 33 bapfuye bafitiwe gihamya naho abandi 17 bagikorwaho iperereza. Hari abishwe n’amasasu y’abapolisi, abakubiswe kugeza bashizemo umwuka, ababuze umwuka kubera imyuka iryana mu maso n’urusenda, n’abaguye mu muvundo bakandagiwe na bagenzi babo.
Icyegeranyo cy’impapuro 37 kigira kiti “Abapolisi barashe urufaya rw’amasasu mu mbaga y’abigaragambya batarobanuye. Abatangabuhamya bavuga ko ubwo abigaragambyaga birukankaga, polisi yabakurikiye abo ifashe ikabarasa, abandi ikabakubita kugeza bapfuye.”
Umuyobozi wungirije wa Amnesty International muri Afurika y’Uburasirazuba n’Akarere k’Ibiyaga Bigari, Michelle Kagari, yasabye ubuyobozi bwa Kenya guhindura imyitwarire y’abapolisi mbere y’uko amatora y’umukuru w’igihugu aba ku nshuro ya kabiri.
Yagize ati “Gukoresha ingufu z’umurengera byamaze kuba karande kuri Polisi ya Kenya bigomba guhagarikwa burundu mbere y’uko amatora ataha aba.”
Urukiko Rukuru rwatesheje agaciro ibyavuye mu matora ya mbere Uhuru Kenyatta yari yatsinze. Raila Odinga, wari umukandida w’Ihuriro ry’Amashyaka atavuga rumwe na leta, NASA, we aheruka kwivana mu matora avuga ko ari bwo azaba mu mucyo. Iri huriro ryasabye abarwanashyaka baryo kwigaragambya buri munsi uhereye kuri uyu wa Mbere.
NASA yanasabye kandi Umuryango w’Abibumbye kuza muri Kenya ngo ukurikiranire hafi ibishinjwa Polisi y’iki gihugu kugira ngo ureberere abaturage batazahutazwa mbere na nyuma y’amatora ku nshuro ya kabiri ateganyijwe ku ya 26 Ukwakira 2017.
Si ubwa mbere hicwa abantu mu mvururu zijyana n’amatora muri Kenya kuko no mu 2008 ababarirwa mu 1000 bapfuye ubwo Mwai Kibaki yatangazwaga nk’uwatsinze Raila Odinga mu matora.
TANGA IGITEKEREZO