Perezida wa Kenya, Uhuru Kenyatta yagiranye ibiganiro birambuye na Perezida Kagame, Obama wa Leta Zunze Ubumwe z’Amerika, ndetse na bamwe mu bayobozi b’ibihugu by’akarere, abagisha inama mbere yo gusigira Visi-Perezida Ruto ubuyobozi akerekeza i La Haye mu Buholandi aho agiye kwitaba Urukiko Mpuzamahanga Mpanabyaha ICC.

Ikinyamakuru The Star kivuga ko Uhuru Kenyatta yagiranye ibiganiro birambuye na Perezida Paul Kagame w’u Rwanda, Yoweri Museveni wa Uganda, Barack Obama wa Leta Zunze Ubumwe za Amerika, Jakaya Kikwete wa Tanzania, Pierre Nkurunziza w’u Burundi na Jacob Zuma wa Afurika y’Epfo.

Kenyatta aregwa ibyaha byibasiye inyokomuntu kubera ubugizi bwa nabi bwabaye nyuma y’amatora ya 2008.

Perezida Uhuru yagishije inama abo yizeyeho ubunararibonye harimo na Perezida Kagame

Muri Kenya, Perezida Uhuru yabanje kuganira na Visi-Perezida Ruto, abashinzwe umutekano we, abanyamabanga ba Leta n’abajyanama mu bya politiki.

Umwe mu bakozi bo mu biro bya Perezidansi ya Kenya yabwiye The Star ko Kenyatta yari amaze iminsi yitegura kandi ashishoza ku kwitaba urukiko rwa ICC.

Ati "Ibyo mwabonye Perezida Uhuru akora cyangwa avuga mbere yo kujya i La Haye kwitaba urukiko yari yarabanje kubitekerezaho kuva cyera kandi yabigishijeho inama impuguke nyinshi.”

Ejo hashize, Uhuru yerekeje i La Haye nk’umuntu usanzwe nk’uko yari yabitangarije Inteko Ishinga Amategeko. Uyu munsi aritaba urukiko rwa ICC abe ari na we Perezida wa mbere ukurikiranwe n’uru rukiko akiri ku butegetsi.

Uhuru Kenyatta yaherukaga kwitaba ICC ataraba Perezida wa Kenya. Aregwa gutegura ubwicanyi bwakozwe n’abo mu bwoko bwa Kikuyu bari bibumbiye mu mutwe wa Mungiki muri 2007.

Uhuru yerekeje i La Haye nk'umugenzi usanzwe

[email protected]