Mu ijambo Kenyatta yagejeje ku baturage ari mu biro bye, i Nairobi, yavuze ko guhera kuri uyu wa Gatandatu saa sita z’ijoro amakamyo atwara imizigo gusa ari yo azajya yemererwa kwinjira no gusohoka mu gihugu binyuze ku mipaka ihuza Kenya na Somalia ndetse na Tanzania.
Yagize ati: “Uyu munsi nemeje ko habaho ihagarikwa ry’ingendo z’imodoka zitwara abagenzi n’iz’abantu binjira ku butaka bwa Repubulika ya Kenya ndetse n’abasohoka, banyuze ku mupaka mpuzamahanga wa Kenya na Tanzania […] kandi harabaho guhagarika ingendo z’urujya n’uruza rw’abantu n’imodoka zitwara abagenzi ku mupaka mpuzamahanga wa Somalia.”
Icyatumye iyi mipaka ifungwa ni uko mu cyumweru gishize, habayeho ubwiyongere bw’abanduye binjiriye ku mipaka ya Somalia na Tanzania. Umukuru w’Igihugu yavuze ko abantu 43 bagaragaye ari ho binjiriye.
Nubwo imodoka zitwara imizigo zemewe kuri iyo mipaka, Perezida Kenyatta, yategetse ko abashoferi bose batwara imizigo bagomba kwipimisha Covid-19 kandi bakemererwa kwinjira ari uko basanze bataranduye.
Umukuru w’igihugu kandi yatangaje ko nta wemerewe kuba ari hanze y’aho ataha hagati ya saa moya z’umugoroba na saa kumi n’imwe za mu gitondo mu gihugu hose mu minsi 21 mu rwego rwo kwirinda ikwirakwira rya Coronavirus.
Yavuze ko bagomba kwita kuri izo ngamba kuko nubwo ‘hari umuvuduko ukabije w’ibihugu mu koroshya ingamba zashyizweho kugira ngo ibihugu bisubire mu buzima busanzwe, hari n’ibindi byoroheje ingamba nyuma bigahura n’akaga k’ubwiyongere bukomeye bw’abanduye’.
Perezida Kenyatta yavuze ko icyo cyemezo cyafashwe mu rwego rwo kurwanya ikwirakwira rya coronavirus, aboneraho no kumenyesha abanya-Kenya ko ingendo zinjira cyangwa zisohoka i Nairobi, Mombasa, Kilifi, Kwale na Mandera nazo zihagaritswe muri icyo gihe.
Izi ngamba zitangajwe mu gihe Kenya yemeje abantu 49 bashya ba coronavirus kuri uyu wa 16 Gicurasi 2020, batanu bagapfa bigatuma umubare w’abanduye muri iki gihugu ugera ku 830 naho abapfuye bakagera kuri 50. Abakize ni 301, ntawakize uyu munsi.
TANGA IGITEKEREZO