Abepisikopi nubwo hari ibikorwa bya Perezida Tshisekedi bashima ngo hari ibibazo igihugu kigifite ubutegetsi budafatira ingamba.
RFI itangaza ko Inama nkuru y’Abepisikopi muri RDC yateranye kuva tariki 24 na 28 Gashyantare 2020 kugira ngo baganire ku mibereho y’igihugu. Bashimye ibikorwa bitandukanye byagezweho birimo, ishyirwaho ryo kwigira ubuntu mu mashuri abanza, uburenganzira bwo gutanga ibitekerezo no kugaruka kwa RDC mu ruhando mpuzamahanga.
Ku rundi ruhande ariko ngo bagaragaje impungenge, zishingiye ku mikorere idahwitse mu buyobozi bw’igihugu. Umunyamabanga mukuru w’inama y’Abepisikopi muri RDC, Donatien Nshole yavuze ko hari ibibazo bikomeye bitarabonerwa umuti [bitatangajwe] biterwa n’amasezerano y’ibanga hagati ya Perezida Félix Tshisekedi n’uwo yasimbuye.
Ati “Ibibazo byinshi igihugu cyahuye nabyo nta gisubizo gikwiye birabona kubera ukutumvikana gukomeje kuranga ihuriro. Ntabwo byemewe ko igihugu kiba imbohe y’amasezerano nayo ahishe.”
Inama y’igihugu y’Abepisikopi muri Congo (Cenco) yavuze ko ititaye ku bikubiye mu masezerano Perezida Félix Tshisekedi yagiranye n’uwo yasimbuye, ariko ko izi neza ko ayo masezerano ariyo yihishe inyuma y’ibibazo biriho muri RDC. Abihaye Imana bose ngo bahangayikishijwe n’imicungire mibi y’umutungo w’igihugu.
Donatien Nshole yongeyeho, ati “Turi kubona abanyapolitiki bari kwigwizaho umutungo mu buryo budasobanutse, banyereza umutungo w’abaturage. Ruswa no gukoresha nabi umutungo w’igihugu birakomeje. Ibyo bikorwa n’abantu bitwa ko barinda umutungo rusange”
Inama y’Abepisikopi Gatolika muri Repubulika Iharanira Demokarasi ya Congo ntiyumvikanye na guverinoma iriho kuva mu mpera za 2019 ubwo yatangazaga ko ibyavuye mu matora bihabanye n’ibyo Komisiyo y’Amatora yatangaje.
Kiliziya yavugaga ko Martin Fayulu ari we watsinze naho Komisiyo y’amatora yemeza ko Tshisekedi ari we watsinze.
TANGA IGITEKEREZO