Bamwe mu baturage batuye hafi y’ikigo cy’urubyiko cya "Maison des Jeunes" ndetse n’umuyobozi bw’iki kigo, bavuga ko abagishiriza ibinyabiziga impande z’icyo kigo ari muri bamwe mu babangamira gahunda zacyo ku buryo bugaragara.

Nubwo ikigo cya Maison des Jeunes giherereye mu Murenge wa Kimisagara ho mu Mujyi wa Kigali mu Karere ka Nyarugenge usanga gifasha urubyiruko rwinshi rukigana mu nzego zitandukanye, ubuyobozi ndetse n’abaturage batuye hafi yacyo bo bavuga ko kuba mu nkengero hakunze kuba hari insoresore zigisha abana moto, iki kikaba ari kimwe mu bibabangamira bikomeye kuko kenshi bituma abo bana bagira ingeso mbi zitandukanye, bigatuma inshingano z’iki kigo zirimo kwigisha ibijyanye no kwirinda SIDA, imyororokere, kwihangira imirimo,ibijyanye n’ikoranabuhanga ( ICTC), imikino ndetse n’imyidagaduro zitubahirizwa.

Kanamugire Faustin utuye mu Mudugudu w’Ubuhoro ho mu Murenge wa Kimisagara, avuga ko nk’umubyeyi ababazwa cyane no kubona ikigo cya Maison des Jeunes gikikijwe n’abantu bigisha moto mu gihe haba hari abana benshi.

Kanamugire yagize ati “Njye mbabazwa ndetse nkanagira impungenge z’uburyo mbona Maison des Jeunes nk’ikigo cyirirwamo abana benshi ndetse n’urubyiruko ubona kiba gikikijwe n’abantu bigisha moto mu gihe bijya biteza impanuka zitanduka”

Ibambasi Claude umuyobozi ushinzwe imiyoborere myiza ubukangurambaga n’uburere mboneragihugu muri iki kigo, nawe avuga ko kuba moto zigishirizwa impande z’ikigo ari ikibazo gikomeye, kuko bishobora gutera impanuka zitandukanye.

Ibambasi yagize ati “Natwe biratubangamira cyane kubona impande z’ikigo higishirizwa za moto mu gihe abana baba bari kuhakinira, gusa twamaze kubigeza ku buyobozi bw’umurenge, ndetse hari igihe baza bagafata izi moto.

Ndayisenga Jean Marie Umunyamabanga Nshingwabikorwa w’Umurenge wa Kimisagara yabwiye IGIHE ko n’ubwo abo bantu bigishiriza moto kuri Maison des Jeunes bagihari, ko babikora bihishe kuko bajya babakorera umukwabo bafatanyije na polisi ikorera muri uwo murenge.

Ndayisaba yagiz ati “ Iki kibazo cya za moto zigishirizwa ku kigo cya Maison des Jeunes turakizi, kandi tujya tukirwanya ndetse dufatanyije na polisi yo mu murenge wacu, ku buryo mu mezi abiri ashize twafashe moto zigera kuri eshanu ndetse naba nyirazo tukabahana, gusa n’ubwo hakiboneka abantu bakigisha gutwara moto hariya babikora bihishe, kuko iyo tubafashe moto duhita tuzijyana bakanahanwa”.

Yarangije avuga ko Ubuyobozi bw’Umurenge wa Kimisagara bwifuza kujya byibuze bakora umukwabo wo gufata izomoto no guhana abazigishiriza kur iki kigo kabiri mu cyumweru.