Uyu wahitanywe na Ebola ku wa gatanu w’icyumweru gishize ni umugore w’imyaka 44 wari warashakanye n’umugabo warwaye iki cyorezo, ariko akaza gukira, abayobozi bagakeka ko yaba yaranduriye mu mibonano mpuzabitsina.

Umuryango Mpuzamahanga wita ku buzima wari wasabye ko abakize Ebola bakwirinda gukora imibonano mpuzabitsina byibura mu gihe cy’iminsi 90. Leta ya Liberia ariko yo yasabye abakize iyo ndwara kwihangana cyangwa nibura bagakoresha agakingirizo.

Minisitiri w’ubuzima Tolbert Nyenswah yagize ati ”Abakize Ebola bagomba gukoresha neza agakingirizo kandi buri gihe bakoze imibonano mpuzabitsina na nyuma y’iminsi 90 kugeza igihe amakuru ahagije azaba yabonetse.”

Liberia iri mu bihugu byazahajwe na Ebola, ariko nyuma bikabasha kuyirwanya. Urupfu rugaragaye nyuma y’iminsi 42 iki cyorezo kitakivugwa muri icyo gihugu, bakaba bateganyaga gutangaza ku mugaragaro ko Ebola yaranduwe burundu.