Ishami ry'umutwe w'intagondwa wa Leta ya Kiyisilamu rikorera mu Burasirazuba bwa Libye ryatangaje kuri uyu wa Kane ko ryishe abanyamakuru babiri b’Abanyatuniziya bari barashimuswe kuwa 8 Nzeri 2014.
Abo banyamakuru ni Sofiène Chourabi na Nadhir Ktari bashimutiwe muri Libye.
Itangazo ry’ishami ryasohowe n’uwo mutwe w’iterabwoba, ryagaragaje mu mashusho ko aba banyamakuru bishwe, rinavuga ko bazize ko bakoreraga televiziyo irwanya idini ya Islam nk’uko tubikesha Jeune Afrique.
Uyu mutwe utangaza ko kubica ari ugushyira mu bikorwa itegeko ry’Imana(Allah).
Sofiène Chourab wandikaga cyane kuri blog mu ntambara y’impinduramatwara muri Tuniziya mu 2011 na Nadhir Ktari wari umufotozi bashimutiwe mu gace k’ Ajdabiya muri Libye.
Iyicwa ry’aba banyamakuru rije rikurikiye iyicwa ry’abanyamakuru ba Charlie Hebdo cyo mu Bufaransa mu gitero cyagabwe ku biro by’iki kinyamakuru kuwa 7 Mutarama 2015.
Iki kinyamakuru nacyo cyakundaga gutambutsa amashusho (cartoons ) y’Intumwa y’Imana Muhamed yambaye ubusa cyangwa akora ibikorwa by'urukozasoni.
Ibitekerezo 0