Akanama k’umutekano ka Loni kasabye ingabo za Loni ziri muri Repubulika Iharanira Demokarasi ya Congo,Monusco n’igisirikare cy’icyo gihugu, FARDC kutazarira kugaba ibitero kuri FDLR nyuma y’itariki ntarengwa yahawe ngo ibe yashyize intwaro hasi bagatangira imyiteguro hakiri kare.

Itangazo aka kanama kashyize ahagaragara rivuga ko nta yandi mananiza n’izarira bikwiye kubaho rigasaba ko buri murwanyi wa FDLR utarashyira hasi intwaro agomba guterwa nk’uko ikinyamakuru CCTV kibitangaza.

Akanama k’umutekano ka Loni kasabye Monusco na FARDC guhita bagaragaza gahunda y’ibikorwa bya gisirikare bigomba gukorerwa kuri FDLR bitarenze mu ntangiriro za Mutarama.

Abarwanyi ba FDLR bari batangaje ko bagiye gushyira intwaro hasi muri Gicurasi, Leta ya Congo ibasaba ko bitarenze ku ya 9 Kamena baba barangije kubishyira mu bikorwa ariko baterera agati mu ryinyo.

Muri Nyakanga ibihugu bya Afurika byahaye FDLR andi mezi atandatu yo kureka burundu imirwano ariko kugeza n’ubu ntacyo irakora.