Nyuma y’uko abantu bagera kuri 70 baguye mu mvururu zashyamiranyije abapolisi n’abashyigikiye Mohammed Morsi wakuwe ku butegetsi n’abasirikare, ubu haravugwa agahenge, imyigaragambyo ikorwa bicaye badakoma.

Nk’uko tubikesha BBC, abashyigikiye Mohammed Morsi wakuwe ku butegetsi, bakomeje kugira imyigaragambyo yo kwicara bakikije umusigiti w’i Cairo, umurwa mukuru wa Misiri. Umusigiti wa Rabaa al-Adaweya ahari habereye imyigaragambyo ubu haratuje.

Abashyigikiye Morsi bongereye ingufu nyuma y’aho Minisitiri w’ubutegetsi bw’igihugu abasabaye guhagarika imyigaragambyo.

Ariko kandi imirwano yongeye kuba mu tundi duce twa Cairo, ibiro ntaramakuru bya Leta byavuze ko hari amasasu yarashwe igihe habaga umuhango wo gushyingura umwe mu bashyigikiye Morsi, i Port Said, wari mu barashwe ku wa gatandatu tariki ya 27 Nyakanga 2013.

Umunyamabanga wa Leta muri Leta Zunze Ubumwe za Amerika, ushinzwe ububanyi n’amahanga John Kerry, yamaganiye kure ubwicanyi bukorerwa abigaragambya mu gihugu cya Misiri, anasaba ko bihagarikwa.