Abategetsi ba Misiri batangaje ko Mohammed Morsi wahoze ayobora icyo gihugu afunze kubera ko ashinjwa gukorana n’umutwe w’intagondwa z’abanyapalesitina wa Hamas.

Urubuga rwa Telegraph.co.uk dukesha iyi nkuru ivuga ko Morsi ngo yafatanyije n’umutwe wa Hamas gucura umugambi wo kugaba ibitero ku magereza kugira ngo bafungure intagondwa z’abayisilamu, igihe habaga imyigaragambyo y’abaturage yarwanyaga ubutegetsi bwa Hosni Mubarak mu 2011.

Muhamed Morsi afungiwe ahantu hatari hamenyekana kuva aho igisirikare kimuvaniye ku butegetsi ku itariki ya 3 Nyakanga 2013.

Hagati aho abantu ibihumbi n’ibihumbi bashyigikiye n’abadashigikiye umukuru w’igihugu wavanywe ku butegetsi mu Misiri, Mohamed Morsi, bahuriye mu mihanda y’i Cairo no mu yindi mijyi, ku wa gatanu mu myigaragambyo isa n’aho igamije kwerekana abarusha abandi ingufu, hakaba hanabayeho gukozanyaho hagati y’impande zombi.

Mu ntangiriro z’iki cyumweru, umukuru w’igisirikare Abdul Fattah al-Sisi, yahamagariye abantu gukora imyigaragambyo yo gushyigikira igisirikare ku cyemezo yafashe cyo guhirika ubutegetsi bwa Mohammed Morsi maze kigashyiraho ubutegetsi bw’agateganyo.