Perezida wa Uganda Yoweri Museveni yikomye urukiko Mpuzamahanga Mpanabyaha, ICC rwatinyutse kuburanisha Uhuru Kenyatta akiri ku butegetsi, arwita igikoresho abazungu bakoresha mu gukoroniza Afurika y’iki gihe.

Museveni yemeza ko ibihugu bya Afurika bikwiye kwisubiraho bikava muri uru rukikokuko rukomeje gusuzugura umugabane wa Afurika nk’uko The New Vison kibitangaza.

Mu ijambo yavugiye mu birori byo kwizihiza imyaka 52 Uganda imaze yigenga Museveni yagize ati.

“Ibibazo byabaye muri Kenya mu 2007 no mu bindi bihugu bya Afurika byari bishingiye ku ngengabitekerezo. Kuba rero ICC ishaka kubikemurira mu butabera ni ubwenge buke.”

Muri ibyo birori byari byitabiriwe na Perezida Kagame, Salva Kiir uyoboye Sudani y’Epfo, na Jakaya Kikwete wa Tanzania, Museveni yikomye akanama k’umutekano ka Loni gahoramo Leta Zunze Ubumwe za Amerika, u Burusiya , u Bushinwa, u Bufaransa, n’u Bwongereza kanze kumva ibihugu bya Afurika byasabaga ko ICC itazongera kuburanisha abakuru b’ibihugu bakiri ku butegetsi.

Ati” Aka kanama kanze guha agaciro ibitekerezo byavuye mu bunyangamugayo bw’Abakuru b’Ibihugu bya Afurika”

Kenyatta n’umwungirije William Ruto baregwa ibyaha byibaasiye inyoko muntu kubera ubugizi bwa nabi bwakurikiye amatora bari bahanganyemo mu 2007 bwahitanye abarenga 1000.

Ashyigikiwe na benshi mu bakuru b’ibihugu bya Afurika n’Umuryango w’Ubumwe bwa Afurika( OUA), Uhuru Kenyatta ashaka ko azaburanishwa ariko yavuye ku butegetsi.

Perezida Kagame, Salva Kiir, Museveni na Jakaya Kikwete

Ku wa Gatatu, Uhuru yabaye Perezida wa mbere uburanishijwe na ICC akiri ku butegetsi.

Urukiko rwa ICC rwakunze kunengwa gukurikirana abakuru b’ibihugu bya Afurika gusa.

Rumaze gukurikirana Omar Bashir wa Sudani, Visi Perezida wa Repubulika Iharanira Demokarasi ya Congo Jean Pierre Bemba, uwahoze ayoboye Liberia Charles Taylor n’abari bayoboye imitwe yitwaje intwaro muri Congo Thomas Lubanga na Bosco Ntaganda.

Abaturage b’ibihugu nk’u Burusiya, u Bushinwa, Leta Zunze Ubumwe za Amerika na Isiraheli ntibashobora kuburanishwa n’uru rukiko kuko bitashyize umukono ku masezerano y’i Roma yarushinze,

Kenyatta witabye ICC ku wa kabiri yakiriwe mu birori bikomeye agarutse muri Kenya.