Nyuma yo kuva mu Rwanda aho yifatanyije mu muhango wo kwizihiza kwibohora ku nshuro ya 20, Perezida wa Kenya Uhuru Kenyatta wageze i Nairobi ku Cyumweru, yatunguwe no gusanga Visi Perezida we William Ruto, atari mu itsinda ry’abaje kumwakira ku kibuga cy’indege, ibintu bitari bimenyerewe muri iki gihugu.

Akigera ku kibuga cy’indege mpuzamahanga kitiriwe Jomo Kenyatta (JKIA), Perezida Kenyatta yakiriwe n’abayobozi batandukanye, ariko batagaragaramo William Ruto, ibi ngo bikaba ari nabwo bibaye ku nshuro ya mbere. Ibinyamakuru byo muri iki gihugu biravuga ko Kenyatta yatunguwe.

Ruto ntagaragara mu baje kwakira Kenyatta

Daily Post iravuga ko aho kuza kwakira umukuru w’igihugu, William Ruto yahisemo kujya gusura imiryango y’abishwe n’igitero cya Al shabaab mu gace ka Lamu.

Ubusanzwe iyo Perezida Kenyatta ageze ku kibuga cy’indege avuye mu mahanga, Visi Perezida we n’abandi bayobozi bashinzwe umutekano nibo baza kumwakira, kugeza ubu hakaba hibazwa icyo Ruto yaba yarakoreye ibi.