Abarwanyi ba Boko Haram bishe abacuruzi b’amafi 48 muri leta ya Borno, hafi y’umupaka wa Nigeria na Tchad ku wa 20 Ugushyingo.

Umukuru w’ishyirahamwe ry’abacuruzi b’amafi muri Borno Abubakar Gamandi, yabwiye Ibiro Ntaramakuru by’Abafaransa , AFP, ko Abarwanyi ba Boko Haram bishe abo bacuruzi babategeye mu muhanda ubwo bari bagiye kurangura.

Ati” Abarwanyi ba Boko Haram benshi bafunze umuhanda uhuza Nigeria na Tchad ku nkombe z’ikiyaga cya Tchad ahitwa Dogon Baga bica abacuruzi 48 bajyaga kurangura amafi.”

Gamandi avuga ko abo barwanyi baciye bamwe mu bacuruzi amajosi abandi bakababoha amaboko n’amaguru mbere yo kubaroha mu kiyaga cya Tchad.

Avuga ko abarwanyi ba Boko Haram babishe badakoresheje imbunda zabo ngo hato badakurura ingabo za Nigeria iza Tchd n’iza Niger zibarwanya muri ako gace.

Inkuru y’ubu bwicanyi yatinze kumenyekana kuko nta miyoboro ya telefoni ikora muri ako gace.

Muri Kanama, Boko Haram yashimuse abantu 97 imaze kwica 28 muri ako gace, abo bashimuswe barimo abagore n’abana bajyanywe mu bwato muri kiyaga cya Tchad, ariko abasirikare ba Tchad batabaramo 85.

Ubugizi bwa nabi bwa Boko Haram bumaze guhitana ibihumbi by’abantu kuva muri 2009. Ivuga ko ishaka gushinga leta igendera ku mahame ya kiyisiramu muri Nigeria y’Amajyaruguru.