Abantu barenga 150 barimo abashinzwe umutekano 44 baguye mu gitero intagondwa zo mu mutwe wa Boko Haram zagabye mu mujyi wa Damaturu mu Majyaruguru y’uburengerezuba bwa Nigeria ku ya mbere Ukuboza.

Amakuru agera ku kinyamakuru Jeune Afrique avuga ko imirambo 115 yagejejwe mu buruhukiro bw’ibitaro byitiriwe Sani Abacha muri uwo mujyi wa Damaturu.

Umuvugizi wa Polisi ya Nigeriya Emmanuel Ojukwu yavuze ko abapolisi 38 n’abasirikare 6 baguye muri icyo gitero.

Abarwanyi ba Boko Haram bangizaga buri cyose mu mujyi wa Damaturu

Umwe mu baganga yatangaje ko imirambo 115 yagejejwe mu bitaro yari iy’abasivile, iy’abaganga n’iy’abasirikare ba Nigeria.

Umuyobozi ushinzwe ubutabazi yemeje ko abandi bantu 78 bakomeretse, 53 muri bo bagasubira iwabo bamaze guhabwa ubuvuzi bw’ibanze.

Itsinda ry’abantu ku giti cyabo biyemeje kurwanya Boko Haram muri uwo mujyi bo bavuze ko abarwanyi ba Boko Haram barenga 40 baguye mu mirwano.

Ojukwu yavuze ko abapolisi benshi biciwe mu biro byabo mu gace ka Gujba mu mujyi wa Damaturu mu mirwano hagati yabo n’abarwanyi ba Boko Haram.

Avuga kandi ko iyo mirwano yabereye hafi ya gereza ifungiyemo bamwe mu bagize uwo mutwe.

Iki gitero kibaye nyuma y’igihe gito abandi 120 biciwe mu musigiti munini w’i Kano, umwe mu mijyi ikomeye yo mu Majyaruguru ya Nigeriya.