Nigeria: Gen. Muhammadu Buhari yatsinze amatora y’umukuru w’igihugu

Radio Ijwi rya Amerika yatangaje ko ibyavuye mu ntara 36 zigize igihugu cya Nigeria, bimaze kumenyekana.

Buhari yamaze gutsinda muri izo ntara zose, akaba ari imbere ya Goodluck Jonathan usanzwe ari Perezida, n’amajwi agera ku miliyoni eshatu mu gihugu cyose.

Kugeza ubu ibyavuye mu matora birimo gutangazwa hakurikijwe intara imwe ku yindi, aho icyicaro cy’urwego rushinzwe amatora rukorera.

Umuvugizi w’urwo rwego yabwiye Ijwi rya Amerika, ko rutazatangaza uwatsinze kugeza ubwo ibyavuye mu matora, mu ntara zose uko ari 36, bimenyekanye.

Hari amakuru avuga ko Goodluck Jonathan yahamaye uwo bahanganye Gen. Muhammadu Buhari amushimira ku ntsinzi ye imuhesheje kumusimbura ku mwanya w’umukuru w’igihugu.

Intsinzi ya Buhari ihigitse ishyaka ryari riri ku butegetsi People’s Democratic Party (PDP), aho ryari rimaze imyaka cumi n’itandatu.

Muhammadu Buhari afite imyaka 72, yabaye umuyobozi w’ingabo muri Nigeria mu gihe cy’umwaka n’amezi 8, nyuma y’aho igisirikare gihiritse ubutegetsi mu kwezi kw’Ukuboza 1983.

Ni ku nshuro ya kane Buhari ahatanira kuba Perezida wa Nigeria, kuva iki gihugu cyagaruka mu nzira ya demokarasi mu mwaka w’1999.
Jean Paul Kayitare

Abantu basaga 800 baguye mu myigaragambyo ubwo Jonathan yatsindaga Buhari mu matora aherutse, bakaba baherutse gusinyana amasezerano yo kuzemera ibizava mu matora nta mananiza.

[email protected]
Twitter: @KAYITAREJean