Mu mezi ashize Boko Haram ikaba yarinjiye mu bihugu nka Cameroon, Chad na Niger, ibi akaba ari byo byatumye ibihugu bituranyi bya Nigeria bihagurukira kugira icyo bikora ngo bihashye uwo mutwe n’ubwo imikoranire hagati yabyo na Abuja igenda biguru ntege.

Iki ni cyo gitero cya mbere Niger igabye kuri Boko Haram ku butaka bwa Nigeria, Ubundi ikaba yarirwanagaho mu duce twegereye umupaka.

Chad ikaba imaze kohereza ingabo zirwanira ku butaka no mu kirere mu birometero byinshi mu majyaruguru y’uburengerazuba bwa Nigeria, Aho imaze kwigarurira uduce twari twarigaruriwe na Boko haram hafi y’umupaka wa Cameroon, nk’uko bitangazwa n’umuvugizi w’ingabo za Chad, Col. Azem Bermandoa.

Col. Azem ati “Turemeza ko ingabo za Chad n’iza Niger zagabye igitero kuri Boko Haram ziturutse muri Niger. Na n’ubu intambara iracyakomeje.”

Umutangabuhamya utuye mu Mujyi wa Diffa, mu Majyepfo ya Niger yabwiye Reuters ko yabonye imodoka hafi 300, zirimo iza gisirikari zitwaye imbunda, ndetse n’amazi zijya ku mupaka mu masaha y’ijoro.

Umubare w’ingabo ziri muri ibi bitero ntiziramenyekana, ibitero bibaye nyuma y’aho Boko Haram yishe abantu bager muri 50 mu Mujyi wa Maiduguri, uyu mutwe wifuza kugira umurwa mukuru wa leta ya kiyisilamu.

Ibi bitero bikaba bibaye nyuma y’aho Umuryango wa Afurika yunze ubumwe wemeje ko ugiye gushyiraho umutwe w’ingabo hagamijwe guhashya Boko Haram, mu mpera za mutarama.

Nigeria na yo ikaba yari iherutse gusaba ubufasha bw’ibindi bihugu ngo ibashe kurwanya Boko Haram nyuma y’uko uyu mutwe utangarije ko ukorana n’umutwe w’intagondwa wiyise leta ya kiyisilamu, ukorera muri Siriya na Iraq.