Abayobozi b’idini rya Isiramu muri Nigeriya bashinja ingabo z’icyo gihugu kuba ibigwari imbere y’ibitero bya Boko Haram bikomeje gutera ubwoba abaturage b’Amajyaruguru ashyira Uburengerazuba muri icyo gihugu.

France 24 ivuga ko banenga ingabo za Nigeriya ko ntacyo zikora ngo zirinda abaturage ibikorwa by’ubwicanyi n’ihohoterwa bya Boko Haram.

Babinyjije mu itangazo abayobozi b’Umuryango w’Abayisiramu muri icyo gihugu bagize bati”Abasirikare bakizwa n’amaguru bagata ibirindiro byabo, intwaro zabo n’ibindi bikoresho byabo byose iyo bumvise ko abarwanyi ba Boko Haram bari hafi”.

Abasirikare ba Nijeriya bate ibikoresho bikomeye ariko bakanga bakitwa "ibigwari"

Aba bayobozi bahagarariwe n’umukuru wabo, Muhammad Sa’ad Abubakar, bavuga ko ingabo zongera kwigaragaza iyo abo barwanyi bamaze koreka imbaga.

Bati “Ingabo za Nigeriya zongera kujya ahabona nyuma y’ibitero by’ubwicanyi. Nibwo zishyira za bariyeri mu mihanda ndetse zikajya gusaka mu mazu bigatera ubwoba abaturage n’ubundi basanzwe barakangaranye”.

Aba bayobozi baherutse nanone kunenga ubushobozi bw’izo ngabo bashyigikira abaturage n’abahigi bamaze igihe bahangana n’abarwanyi ba Boko haram.

Ubugwari bw’ingabo bubangamiye perezida Goodluck

Perezida Goodluck Jonathan yamaganye ibyo bivugwa n’abayobozi ba Isiramu yemeza ko nta muyobozi w’idini ugomba kwivanga mu bibazo bya politiki n’igisirikare.

Mu gihe Goodluck yitegura kwiyamamaza mu matora y’umukuru w’igihugu azaba muri Gashyantare 2015, ntavugwa neza n’abaturage be ndetse n’umuryango mpuzamahanga kuva mu kwezi kwa kane ubwo abakobwa b’abanyeshuri 277 bajyanwe bunyago na Boko Haram ahitwa Chibok.

Goodluck ashinjwa kuba adashoboye kurinda umutekano w’abaturage be ngo abakize Boko Haram.