Abanyururu 175 batorotse bafashijwe n’igitero cyagabwe n’abantu bataramenyekana bitwaje intwaro kuri gereza ya Akure iherereye muri Leta ya Ondo.

Jeune afrique dukesha iyi nkuru ivuga ko iki gitero cyabaye mu ijoro ryo ku wa gatandatu rishyira ku cyumweru tariki ya 30 kamena 2013 nk’uko bitangazwa n’umuvugizi w’amagereza muri Nijeriya.

Umugenzuzi wa gereza ya Akure, Tunde Olayiwola, yatangaje ku rubuga rwe rwa internet ko iyo gereza yatewe n’abantu bagera kuri 30 bitwaje intwaro bagasenya urukuta bakinjira bagacikisha abanyururu 175.

Umuvugizi w’amagereza muri Nijeriya Ope Fatinikun yemereye Ibiro Ntaramakuru by’u Bufaransa (AFP) ko iki gitero cyagabwe n’abantu batazwi, abanyururu benshi bagatoroka aho yirinze gutangaza umubare wabo.

Umutwe wa Boko Haram umenyerewe mu bikorwa bigamije guhungabanya umutekano muri iki gihugu urakekwa kuba inyuma y’ibi bikorwa n’ubwo umuvugizi wa polisi muri Leta ya Ondo, Wole Ogodo avuga iki gitero ntaho gihuriye n’uwo mutwe.

Igihugu cya Nijeriya gituwe kurusha ibindi muri Afurika kinatanga kandi umusaruro wa peteroli uruta uw’ibindi bihugu muri Afurika gikunze kurangwamo ibikorwa by’umutekano muke, ibyinshi bikorwa na Boko Haram n’umutwe wa Ansaru bivugwa ko uyishamikiyeho.

Gereza yari ifungiyemo abo banyururu batorotse